Gait van de Renderklippen: Soezes

Ie wilt d’r niet an, mar met ’t klimmen van de jaoren wördt ‘t met de veerkrach niet bèter.  Met de gimmestiek van Duco ‘s maans op de tilleviezie blief ik nog aorig aoverende. Eerst nao een paar keer bukken tegen de vlakte, en noe doe ik ’t hele programma zonder muuite. Zelfs Merie stik de duum op.

Wat niet wegnemp dat ’t met ’t benul bie vlagen de verkeerde kante uut schut. Kottens met Merie, Henk en Anneke nao Den Haag. ’t Begun met ’t anmelden in ’t Harde. De vrouwuu wissen zich gien goed raod en Henk dee-j ’t veur. Die kent gin nood, mar speult wel graag de eerste viool. 

In de trein nao Amersfoort controle. Iederene worden goed ekeurd, mar Henk kreeg te heuren dat hee niet in eschreven stun. Hee mos dat in Amersfoort vanniejs doen en de conducteur volgen ‘m op de voet.

Ik heb slim staon lachen, mar bie ’t uutstappen in Den Haag bleef daor niet veul van aover. Ik hiele ’t kaarten baoven zon magneet mar stappen nao de andere kante en daor worden ik e blokkeerd. 

Een aorig deerntien naos mien wenken dat ik de arms umme eur hen mos slaon en dan tegelieke met zien beiden deur ene ruumte. Dat liet ik mien gien twee keer zeggen.

Met as risseltaot dat Merie krange in de huud was.

Afijn, met koffie en wat d’r bie raken wie weer in de goeje stemming. Dat worden nog een stuk beter in ’t Mauritshuus. Wat een machtigen hoop schitterende schilderiejen. De meesten uut de tied van de Tachtigjaorige Oorlog. 

Toen gien gehaos, mensen namen de tied en dat deuden de schilders ok. ’t Was genieten kan ik joe vertellen. D’r was nog tied aover veur de Gevangenispoorte bie de Tweede Kamer in de buurte. 

Foi foi wat worden de luu eeuwen geleden te pakken eneumen. Veur ’t minste geringste de vingers d’r of en alleent a-j een veuranstaonde funksie innamen dan kwam ie d’r zonder kleerscheuren van of.

Al met al toch een mooi daggien. Op de trugweg kwam een nieje conducteur an Henk vraogen of hee noe wel zien kaartien op orde had. ’t Was  kennelijk spoorbreed deur egeven. De leermeester en penningmeester mos van angst nog een keer nao ’t twalet en dat kos vandage de dag ok gien griepstuver meer. 

Ontvank de groetenisse van GAIT.