Gait van de Renderklippen: Tramp

Twee bewoners van de Renderklippen loop te màttelen en ik kenne ze mar al te goed. Ik liete mien aoverhalen umme met Merie bosschappen te doen. As d’r iets is waor ik een hèkel an hebbe is dat geslenter bie de kruujeniers, mar ik kan eur niet met een zwaore tasse laoten sjouwen.

Ik wete niet of ’t joe is opevallen, mar ze maak aoveral versmallings umme te veurkomen dat ze met fat bikes en zo langs openbare gebouwen jaag en zo de oldere mense van de pinnen riejt.

Bie ’t gemeentetehuus lagen ok stellegien takken waor a-j aover mossen stappen. Merie keek teveule de andere kante uut en viel op de rechterknie. 

En op zukke monumenten reageert ze dat vake op mien of. “Een bettien keerl schup dat spul an de kante Gait.”

Dat liet ik mien gien twee zeggen en halen de schoen an. 

Twee tel later lag ik op de grond te karmen en kwam met een zere knie bienao niet meer aoverende. Ik wol goed doen en ’t worden veule piene bie de trap nao. 

Wat zeg ik joe: dit was wat mien betref een aovertreffende trap. De schoene uut en ik zagge de kleine teen met de seconden gruuien. Ik mut noe zelf bepaolen wat de grote en wat de kleine tene is. 

Merie en ik bint as twee verschuppelingen weer op huus an eigeisterd. De luu bie ’t gemeentetehuus zult wel edach hebben: twee olties die ze de ofjach heb egeven.

Ik kriege met gien schoenlèpel ter wereld de schoene nog an en met Merie kunt ze dweilen in plaatse dat zee zelf zich buk. Alderkeizers. Wie vuult ons op de teenties etrap, mar deur wie dan wel? Niet anders dan deur ons zelf. As d’r ene bie ons op de belle druk dan duurt ’t zo lange veurdat wie bie de deure bint dat d’r ene met veule haos al weer op de fietse zit! 

Dit was wa-j nuump een tramp met kramp. Weg met die pruttel bie gemeentetehuze en zo. Dan toch bèter een bult lawaai veur de ambtenaren as twee olde mensen in de prak. En weet ie wat wie noe ok nog te heuren krieg as ze ons ziet màttelen? Wat daor ok gebeurt op de Klippen: ze holt de poot stief! 

Noe zeg ik joe. In elk geval hef de zunne weer een hoop goed emaak. 

Luu, geniet van ‘t veurjaor en blief aoverende. Groetenisse van GAIT.