Gait van de Renderklippen: Hoornedol

Begint Heleen niet aover voetbal en al helemaole niet aover Ajax en Amsterdam want dan loop ie de kans een petätter te kriegen. ‘t Is dat zee töt de beschaafde kante van disse wereld beheurt, mar ’t zit eur  alderkeizers hoge.

Johan, eur man, is een fan van Ajax. Zelf hef ze niet zo heel veule met dat getramp, mar as ’t d’r op an kump vuult ze toch meer veur Feijenoord. Dat wil d’r thuus nog wel is hen knäärpen, mar dan meer met de vente die ok al verdeeld bint. “Krieg ze de bal en trap ze ‘m weer weg. Hoe gek kunt manskêêls wèzen”, schuddekop Heleen. En dan dat vernielen in de stadions, dat stun eur nog meer tegen.

Hoe dan ok: Johan kreeg veur zien verjaorsdag een mooie tribuneplaatse veur twee personen bie de Amsterdammers an ebeuden. Ajax tegen Groningen. En umdat Johan d’r op stun liet ze zich aoverhalen umme eur man te vergezellen. De vente gaven eur ’t leste zettien. Met tegenzin en een pongel brood dan toch mar op weg nao de Randstad. 

Dat hef ze eweten. Een gedoe umme de zitplekke te vinden, fouilleren. De schik was d’r bie eur al gauw of. Ze zaten nauwelijks of d’r begun een vuurwâârk zo as ze ’t nog nooit van eur lèven mee had emaak. En metene d’r nao de oproep umme ’t stadion weer uut te gaon. En ’t gemattel begun vanniejs of an. Heleen raken in alle staten. Wat ze eers in de broek had schaof deur nao de nekke.

“’t Waren in elk geval mooie vuurpielen”, proberen Johan in e trein op huus an de stemming nog iets te verbéteren, mar dat warken as een rooie lappe op een stier. Johan was d’r jaorig mee! 

Ze krieg ‘t kaartien weer vergoed, mar alle ellende mutten ze op de koop toe nemmen. Johan wil ‘t goed maken. Deur de zoere appel hen bieten en de volgend ekeer nao de Kuip. Mar dat ballegien had hee béter niet op kunnen gooien. ”D’r deug van dat hele voetbal van oe gien bal. Rotterdam of Amsterdam, ‘t is ‘t zelfde vleis wat ze in de Kuip heb”, sprak zee met consumptie. ‘t Enige wat ze met de knikker hef is balsturigheid en daor zal Johan ‘t nog een helen hoop verjaorsdagen mee motten doen. Luu, maak ‘d’r met mekare mooie feesdagen van in disse donkere dagen.

Gait.