Gait van de Renderklippen: In de wärre

Wie woont al tegen de vuuftig jaor bie mekare, nooit gien gedoe, mar veurege wéke gunk ’t scheef op de Klippen. Buurman Knelis was de grote boosdoener. Een stel vente trappen tegen een balle. Zien kleinzeune Jantien was d’r ok bie. Eerlijk is eerlijk, Knelis voetballn vrogger in ’t eerste en die kon de knikker wel raakn.

Hee maken zich kwaod umme Jantien, waorvan ’t leek of die de linkse schoen rechts an had etrökken en de rechtsen an de linkervoet. “Geef hier die balle”, zei hee en halen an. Niet zon bettien ok. ’t Gevolg was rinkel de kinkel en een rute bie ons te hetter en te fletter.

Daor mu-j Merie niet mee ankomm. Die staof d’r op of en maken de buurman dudelijk hoe of zee aover zien getramp dag. Ik hadde een bettien met um te doen. Hie stun d’r bie as een verzaopen katte met de pette in de hande.

De man van ’t glas kon de rute niet eerder as aover drie dagen ofléveren en daormee raken Merie nog vâdder op de kaste. 

“Heur ie dat Knelis, verschuppeling. Ie zörg mar dat ’t op een of andere maniere weer gauw in orde kump, want ik blieve niet zo lange in de kou zitten.”

Knelis wol eur tegemoet komen. “Dat kump wel ree Merie. Ik regele glas in….” Vädder kwam hee niet. Merie staof op ’m of. “Bi-j noe toch helemaole besukerd? Glas in lood? Wat denk ie wel, dat bie ons ’t geld van de boom völt? Dat doet alleent de eikels en daor komp de wilde värkes op of die mien de hele hof verrinneweerd.”

Knelis kreeg egees gien gelégenheid meer umme zien onderbreuken zin of te maken. “Ik bedoele …”Mar Merie wis wel wat of hee bedoelen zonder dat d’r nog ietsies an was toe evoeg. 

Ik hadde ‘t wel deur, lei de hande op Merie eur scholders en zei: “Hee bedoelt glas in nood.” 

’t Drung niet gelieke töt eur deur. Integendeel. Of ik mien d’r ok nog zo neudig mee mosse bemuuien.

De buurman kaos de wieste partieje, gunk op weg en nog dezelfde aovend was d’r een noodveurziening etröffen.

‘t Hef d’r effen veur ehollen, mar toen ‘t ene keer eland was hef ze Knelis en Mina evraog veur een bakkien. Vergéten dat ze kots teveurten al op een andere maniere op de koffie waren ekomen.

Ontvank de groetenisse van GAIT.