Gait van de Renderklippen: Radiostilte

A-j nao gaot wat d’r allemaole mis geet a-j dinge op ene hoop gooit dan loopt oe de griezels aover de rugge. ’t Begun al met de kruujeniers, waor a-j zo ongeveer um elke hoek terechte kunnen veur de bosschappen en veur ‘n praotien. Dat leste mu-j niet uutvlakken, want umme in stijl te blieven, an eenzaamheid hadden de luu in die tied gien bosschap.

Niet zoveule later wordn kleine schoolties opheffen en bie mekare voegen. In Epe heb ze daor toen ‘t college van ach en wee nog met rotte eiers bekogelt, mar ’t worden toch ’t doojer ende.

Ze-k niet dat de krante oe niet op de heugte hölt, want dan krieg ie ’t met de dikkedeur van disse uutgeverieje an de stok. Die zörg d’r nog veur dat iederene hier in de umtrek op de heugte blif van wat d’r gaonde is.

En a-j iets uut de buurte niet vienen könt dan mu-j de luu die ’t organiseert an de botten die te gemakzuchtig bint umme de redactie daor melding van te doen. Ik wete dat Jan Nathan Rozendaal, de börgemeester van Elburg, d’r ok zo aover denk, de kranties van veur töt achter spelt en toch ontevréden is aover iets wat dicht in de buurte lig.

Ik bedoele de jonges en deerns van de lokale radio, die-t ze vanuut Den Haag de nek umme dreig te drééjen. Ok hier mut alles op ene hoop en is d’r temee gien plekke meer veur ’t lokale geluud. Ik bin sporttief genog umme niet te zeggen da-j toch an Huus an Huus genog heb. 

Nee, ie wilt ok bes een keer een stemme heuren, want dat hef zien eigen charme. Opgaon in een groter geheel hölt volgens Jan Nathan in da-j ten onder gaot in ‘t niejs van de stad en as plattelandsgemeente een onderkruupsel dreig te worden. Kiek nao de Kamer waor de stadsen ‘t ok veur ‘t zeggen heb. De huus an huus blade bint met veursprong nog de media waor a-j ‘t van mutten hebben, mar dat wil niet zeggen dat d’r gien andach mut wézen veur ‘t lokale woord. ‘t Kan hastik goed naos mekare bestaon. Dus ik haope dat Rozendaal zien stemme in ‘t Binnenhof niet buten de deure wordt ehollen.

Mar dan wel de krante ok financieren en niet allene de radio.

Zo, dat is d’r uut.

Groetenisse en een mooie wéke. GAIT