Gait van de Renderklippen: Pierebad

Met euro’s is’t niks anders as met de gullen vrogger: ie kunt die mar ene keer uutgeven. Oldebroek hoef ie dat niet uut te leggen. Daor heb ze zich met wat extra geld uut Den Haag nog staonde kunnen hollen, mar de veuruutzichten bint richting 1928 en wieter weg niet bes.

Wat dat an geet steet Elburg en Nunspeet ’t zelfde te wachten. En ie mot d’r niet an denken dat ’t met ’t smeden van een kammenet Belgische toestanden wordt, want dan lup ’t temee nog dunner langs de klongels. En noe-t ze in Den Haag een hok vol miljoenen tekot komp veur de nieje Tweede Kamer, zult de Hollanders ’t wel weer op ’t platteland willen verhalen.

Niet alles kan op dezelfde maniere deur gaon. De Veldkamp kos een smak geld noe de éépelfabriek gien warmte meer of gif en een kolde sanering an de botten kreeg. D’r mut dus met gas worden estaok en dat kos een alderkeizersen smak pegels. Ja, daor stao-j dan Ton Heddema. Zit ie kold op ’t pluus en dan mu-j as penningmeester van ‘r college metene oew anhang in Wezep laoten weten dat ’t met dat grote zwembad niet vädder meer kan op disse maniere.

De Veldkamp geet tegen de vlakte en as ik Merie geleuven magge dan kump d’r een pierebad veur in de plaatse. “Dan kun ie d’r niet meer terechte, want as ie d’r in stap is dan dat nieje dink metene hastik vol”, liet ik eur weten. Dat hef mien een bult veur de kop op eléverd en veur de ragebol is ’t allemaole nog slimmer of elopen. Die is niet langer bruukbaar.

Ze le-k temee wel een veul kleiner bad an, mar ’t is ok weer niet zo da-j uut mutten kieken met onder water te gaon a-j niet met de kop tegen de kante an wilt smakken. 

‘t Wordt een functionele plas water, as ik ‘t goed begrepen hebbe. Niet met toeters en bellen, gien glierbanen, geschik umme de vente te leren zwemmen. Mar ja, bint d’r temee nog genog pietermannegies in de knippe umme daor de badmeisters mee te betalen? Dat is ok de vraoge. Merie menen ok nog dat Oldebroek noe de ene helfte krig en Wezep de andere helfte, mar ik denke dat ze teveul wolven veurbie hef zien komen op de Klippen. Luu, de temperaturen wordt iets hoger en holt de klongels d’r onder. GAIT.