Gait van de Renderklippen: Zwambad

Bie de gemeente Oldebroek en meer speesjaal in Wezep zit ze al een hele tied in spanning aover ’t zwembad De Veldkamp.

’t Colleezje van ach en wee hef al een keer of wat een nieje daotum vaste esteld waorop de wieze raod mut beslissen aover de toekomst.

Eerlijk is eerlijk, ze heb d’r al veule woorde an besteed, mar de lesten kunt ze mar niet deur ’t strottenhoof kriegen. En zo liek ’t al met al steeds meer op een zwambad. Gien mense die hardop dörf te zeggen: laot mar zwemmen. 

’t Is al slim genog dat ze ’t schoelzwemmen heb of eschaf in dit land. Helemaole gien bad meer dat liek ondenk- en ondankbaar.

Ze kregen töt voor kort de warmte van Cêla Vita, mar de eerdappelfabriek is in de puree edrééjd en dat is hastik zunde. Noe mut ’t gas d’r op en dat kos een hele bonke pegels.

De belangstelling veur De Veldkamp trek de leste tied juus weer an en de luu die d’r achter staot völt niks te verwieten. Die trek d’r hard genog an.

Zol ‘t dan zo wézen dat daordeur bie ‘t colleezje kold water vrees is ontstaon? 

Hoe dan ok mag De Veldkamp niet verwateren. Al helemaole niet veur de vente die de zwemkunst nog niet meester bint. Dan is zwamkunst toch een heel stuk makkelijker.

De raodsleejen temee met een zwemband ’t gemeentetehuus in umme de kop baoven water te hollen? Laow eerlijk wézen, Oldebroek zwemp niet in ’t geld. Liever op de buuk zwemmen dan ’t hele bad op de buuk schrieven dunk mien. ’t  Handhaven van De Veldkamp is bepaold gien water nao de zee dragen.’t Opheffen van ‘t bad zal de kolde griezels aover de rugge laoten lopen. ’t Water steet de gemeente Oldebroek nog niet an de lippen naodat de meicirculaire, zo nuump ze de schrieverieje uut Den Haag, iets meer financiële aosem hef op eléverd. Mar in de brief van september was ’t allemaole al minder florissant.  As ’t rijk Oldebroek temee in de kou löt staon is ‘t toch hendig umme wat warm water aover de rug te kunnen laoten lopen.

Groetenisse van GAIT.