Gait van de Renderklippen: Sôezen

Het gebeuren bie één van rotondes waor Nunspeet in grossiert. Of ie noe op weg bint naor Hierden of naor Elburg: ’t is niks as ofremmen en weer optrekken. Mar de veiligheid wördt d’r wel mee ediend en daor geet ’t toch umme.

Bie die rotondes mu-j vanzelf wel de voet van ’t gas halen. Veurege wéke gunk ’t bie mien bienao mis. Ja, wach effies, ik zatte niet te sôezen, dat deud d’r ene die de rotonde op ree-j waor ik al gangs was. “Zeker een vrouwe”, zeg Merie en die kent eur Pappenheimers. En werendig, ze had geliek.

Een sjaffeuze op lééftied, die zó gapen dat eur ’t kunstgebit d’r bie uut de mond viel. Effies later bie de super kwam ik eur tegen. Met de kunsttande d’r weer in zo a-j zult begriepen. 

Ze kwam gelieke op mien of umme eur spiet te betugen en mien op de scholders te kloppen veur mien handelswieze waordeur ik veurkommen hadde dat ze nao ’t gapen ok niet weer zol kunnen slaopen. 

Een heel verhaal kwam d’r achter an. Eur man Gradus kreeg de volle laoge.

“Wie waren gisteraovend bie mien breur op de verjaorsdag. Ik krege ‘m niet mee op huus an. Elk pilsien was de lesten mar de klokke tikken deur en ’t was dikke nao twaalven dat ik onder de plodden lagge. En ie ziet wat dat veur gevolgen kan hebben.”

“Mar ie hadden toch zelf niet edrunken?”, was ik zo onwies umme op te marken. Ze keek mien an of ze ’t tegen een gaperd van een manspersoon had. As of ik niet wisse dat een geheelontholdster niet nao drank taalt. Ja, dat wis ik natuurlijk wel, mar niet dat zee lid van die club was.

Ik hadde nog kunnen zeggen dat niet drinkers wel gapen kunt, mar ze had een dikke paraplu in de hande en dat heb ik dus wieslijk mar niet edaon.

Ze zal ’t thuus met Gradus wel uut evöchten hebben en ik wete uut ervaring waor dat op uut kan drééjen.

Ik worde of eleid deur een pasberich van Oldebroek. Dat ze ondanks de hoge uutgaven gien gapend gat in de begroting heb en zelfs nog een paar griepstuvers aover holt.
Dus ok daor hoef gien mense wakker van te liggen.

Geniet van de hâârfskleuren in de bos. ‘t Is genieten van ‘t gegeven dat de natuur d’r gekleurd op stiet.

Groetenisse van GAIT.