Gait van de Renderklippen: Gemekker

Mien nève Hendrik hef veurege wèke tegen zien zin een halve aovend in ’t café ezèten. Hee hef daorbie ‘t wereldrecord op de klokke kieken verbröaken.

Nao twee borrels is hee weer op huus an esjacherd, met een gezichte waor a-j de argernis van of konnen scheppen.

Dit verhaaltien is een schoolveurbeeld van langs mekare hen praoten of gewoonweg slietaazje an ’t benul. De geitenfok vergadert steevast bie wat ik veur de veiligheid De Bok zal numen. De dädde donderdag van de dädde maond um half achte komp ze bie mekare en daor ku-j de klokke op geliek zetten. 

Hendrik is as algemeen adjunct – da’s Algemeen Beroerd Nederlands veur ene in ’t bestuur die ze alle kanten uut kunt sturen –meestieds ’t eerste binnen bie Willem en Anna van De Bok. Dat deud e vrogger al umme as eerste op de pot met segaren an te vallen. Dat hef hee later mar zo elaoten.

Dit keer zat hee al een steugien stik allene. Samen met Anna snappen hee d’r helemaole niks van dat d’r gien mense op kwam draven. En met zien harloozje was niks mis. Wat ik al heb ezeg: nao een dik half uurtien was ’t um genog, hef hee Anna de groetenisse edaon, en is schuddekoppend de slieterieje uut estap. 

Bie ’t fietsenhok kwamp hee Willem tegen. “Wat is d’r met oe an de hand? Is d’r brand da-j ‘m al zo gauw smeert?”, wol die van um weten. Hendrik snappen d’r helemaoile niks van. “Noe mu-j toch ophollen. D’r is gien mense op kommen dagen. Dan is ’t veur mien al lange niet meer veuruit met de geit.”

Willem scheuf de pette nao achter, wees nao de grond, nao de kelder. Daor van achter ’t venster zwaaien een hele bonke handen eur kante uut. Allemaole van de geitenfok. “Ik kriege temee volk veur een buurtfeest en heb ze veur disse keer nao de kelderruumte verwezen. Och jongens, dat heb ik Anna vergéten deur te geven.”

Ie könt oe zo veurstellen dat ‘t veur mien néve anvulen of ze um, juus ja, bie De Bok hadden edaon. Hee hef de vergadering wieter veur de res laoten schieten. En ene keerweer bie Toos mekkeren hee nog slimmer as de beide geiten achter ‘t huus.

GAIT