Gait van de Renderklippen: Taalgeknooi

Ie ziet ze steeds meer: plekken onder de grond waor a-j oew blik kwiet kunt. Zelfs op ’t platteland is d’r in dit dichtbevolkte lantien haoste gien plek meer veur ’t parkeren. En de luu wilt met eur karregien töt veur de winkel.

Ik hebbe daor begrip veur as ’t umme de olderen onder ons geet die niet meer goed uut de voete könt. Mar ’t is bie pattie luu al net as met de scholen: de vente veur ’t klaslokaal ofzetten. 

Wat een verschil met vrogger toen de kinder zelf de weg wissen te vienden en ’t gepämper nog egees niet in de luiers lag.

Veurege wèke had ik ’t aover de parkeergaraazje in Harderwiek; gister mos ik nao Epe. Daor is ok al een hele tied een ondergrondse en dat hef niks met de oorlog te maken. Ie kunt daor as ’t ware zo ’t gemeentetehuus in riejen. 

Gemak dient de mens. Mien oog viel op een stel nooduutgangen, mar meer nog op een tekst. Alleen toegang bij camaliteit. Ik hebbe d’r stillegies bie staon te lachen. De parkeerplekke stiet d’r al al meer dan tien jaor en kennelijk is d’r nog gien mense ewes die disse schriefblunder hef opemâârk. Ik nemme an dat d’r in al die tied gien mense van de nooduutgang gebruuk hef hoeven te maken, want ’t is hier toch niet ’t episch centrum van de calamiteiten. Dan zol ie van ‘t epecentrum mutten spréken.

Is ‘t oe/ule niet opevallen hoe ommenullig slordig d’r met onze taal wordt um esprungen. Nog lös van ‘t feit dat ze met alles in ‘t Engels an te priezen de slordigheid kunt verbloemen. As d’r temee ‘Ik wordt hier niet goed van’ steet te lézen bint d’r met weinig die daor, juus ja, niet goed van wordt, mar dan wel zonder de t van gekromde tenen.

’t Wordt tied dat d’r luu opstaot umme de taal niet vadder te laoten verslonzen en een ongelukkien niet as camaliteit weg schrief. 

Wie schrif die blif,mar dan mut ’t wel kloppen. Nieje Nederlanders die aover de d en t’s struukelt hoef zich wat dat an geet gien zörgen te maken. Misschiens trouwens daww d’r goed an doet um dat met die d en t in de parkeergarage te zetten. D en t: dat steet dan veur d’r uut!

Merie gif an dat ‘t tied is veur de meddagpot. 

Groetenisse van GAIT.