Gait van de Renderklippen: Neegnzeuventig

A-j met een stellegien manskeerls op pad gaot dan mu-j niet gek opkieken da-j op een of andere maniere de boot in gaot. Zeker met ’t ofslaon van de snelweg en bie-j ’t parkeren.

Kottens was ik betrökken bie een veurbeeld. Wie/wule mossen nao Harderwiek en dat hef in zoverre wat meer te betekenen da-j-daor alleent oew autogien neer kunt zetten a-j de knippe trek.

Laot ons dan mar mooi darps blieven en d’r hooguut met een blauwe zône van of kunnen komen.

Wie waren met vier mansluu en ’t praoten was niet van de luch. Zo ongemâârk ree-j Henk, de sjaffeur, de parkeergaraazje in en ’t praoten hiel an. Henk had zelf ’t hoogste woord en kletsen deur tötdat wie nao een runtien of wat bie neegnzeuventig nog een plekke vunn.

Ik heb nis ezeg en zol dat spul op de terugweg verrassen. En ja heur, ene keer weer terug in dat autohol heuren ik Henk zeggen: wie weet ’t nummer nog. Gien ene reuren um en toen heb ik triumfantelijk mien securiteit onder bewies esteld.

Mar wie waren d’r al gauw achter dat bie ’t getal ok een cijfertien heuren: van A töt E an toe. Och mensen nog an toe. Wie waren een trap op wat af egaon dus bint mar bie E begunnen. Gien auto te zien op- neegnzeuventig. Bie D alleent een Duitse BMW op die plekke.  En onderwiel zakken ons de muuwigheid in de klongels. Ene van de keerls menen dat ’t veule minder treejen waren en dus terug nao A. Weer niks te ziende en dat ko-j van B ok zeggen.

“Jonges, a-j A en B ze-k mu-j ok nao C”, menen ik lollug te wèzen. 

Dat kloppen ok nog. Twee van ons mos ie zo ongeveer oprapen. Een andere inzittende, die met de buurman op de terugweg had ereejen, zol bie de super weer op epik worden deur zien maot die wat eerder was vertrökken. Mar ene keer daor waren hee en zien auto nâânt meer te zien. Gien wonder. D’r waren drie kwartier verstreekn. Op zien tillefeuntien worden niet ereageerd dus die mos met de benewagen weer op huus an.

Een dink is zeker: maak d’r een foto van a-j oew karregien stalt en holt op tied de kleppe dichte. Die van de auto en die van oezelf. 

Groetenisse van GAIT.