Gait van de Renderklippen: Gröalen

Ik hebbe niks met motoren. ’t Enige wat bie uns op de Klippen an brommen veurbie kump is Merie die mien dan de broek of bokse opbindt. 

Toch glundern ik net as een hele smak volk as onze Max Verstappen ’t hardste van de hele wereld aover de bane joeg. Vier keer wereldkampioen en d’r mankeren niet zoveule an of wie/wule gingen in de règenboogtrui onder de plodden.

Noe zien karregien niet meer zoveule peekaas onder kappe hef en hee ’t keer op keer of mos leggen tegen twee die een snellere wagen onder de konte heb, is de schik d’r veur heel veule zogenaamde liefhebbers van of. Op de tilleviezie, in de kranten is ’t nao een achterliggende pagina escheuven. ’t Kleurt van veur töt achter oranje. ’t Grote gröalen umme Max hef de kop op esteuken. 

Mar ie könt d’r van op an dat daor noe ok vinnig de klad in kump. ’t Volk is veur de winnaars, niet veur de manmoedigen. Eerder al marken ie dat bie Johan Cruijff. Hee worden de hemel in eprezen, mar toen hee van club veranderen en keus veur de Spaanse zunne, te pakken worden eneumen deur eens sjacheraar van de Balkan, gröalen de bewonderaars van gister. De voetbal hef d’r naogenog gien ene meer uut de eigen competitie in ’t oranje lopen. Die wordt of etroef deur de speulders die temee wereldkampioen wordt. Mar ze konnen de Polen d’r met die giganten niet onder kriegen en hadden in Litouwen machtig veule geluk dat ze met drie punten in de knippe weer in ’t vliegtuug konnen stappen. 

De superieuren uut de Engelse competitie wollen zich de broek niet smerig maken en kregen naogenog de deksel op de neuze. A-j in de krante een pagina of wat nao achter keken zag ie daor dat Max de luu met een snellere bolide ’t naokieken had egeven. En dan drééjt bie mien de motor ok een stukkien sneller. 

Gien hoogmoed mar d’r an gaon en nooit opgeven. Umme in de beeldspraoke te blieven: MAXimaal gas geven. Dat stuk mut Koeman temee mar in ‘t kleedhok hangen. De moraal van ‘t verhaal: wie de meeste energie in iets stik kan ‘t winnen van luu met meer talent die teveule nao ’t banksaldo kiek. Ontvank de groetenisse van GAIT.