Column: Kleinties

Ie zult mien daor niet zo vake zien, mar Merie die lus d’r wel pap van. Ik hebbe ’t aover winkelen. As ze dit onder ogen krig dan weet ik al wat mien te wachten stiet: een flinke vège uut de panne. “As ’t van oe zol mutten komen Gait, dan liejt wule op de Klippen net zoveule honger as de mensen in de ontwikkelingslanden. Heb daor mar is een bosschap an.”

Eerlijk is eerlijk: wat dit an geet hef zee ’t grootste geliek van de vismârk. Merie kump de leste tied steeds vaker van de supers terugge met een zoer gezichte. Vrogger bie de kruuienier um de hoek brachen ze oe de bosschappen thuus, halen ze van teveurten nog de lieste op van wa-j neudig hadden. En kon ie an de kassa nog effies de leste niejgies uut ’t darp deur nemen. Dat lig al heel lange achter ons.

Mar bie de super geet ’t allemaole wat zakelijker en mu-j oe mar zien te redden. En dat völt vies tegen. Kottens staof Merie binnen met een rood gezichte en beide hande op een pienlijke rugge.

Toen ze weer wat bie bloed was kwam ik achter de oorzaak.

Bie de supers, ok en veural bie de ene die zeg dat e op de kleinties let, staot um mar wat te numen de ene keer de melkpakken zo ongeveer an de grond en de keer d’r nao zo hoge dat pättie vrouwluu d’r met gien meugelijkheid bie kunt. En umdat mien Merie meer in de breedte dan in de lengte scoort mos die bukken umme bie de zuvel te geraken. En toen hef zee een beste smak emaak.

Een keer daorveur mos de langsten van ’t passeneel d’r an te passe komen umme met leddertien de producten te pakken. Ze heft de penne epak um an die alderkeizers grote grutters eur ongenoegen kenbaar te maken. Of ’t d’r noe van kump dat temee bie elk schap trappien stiet? Wie ’t weet mag ’t zeggen. Merie is d’r van aovertuug dat ze Appie klein kan kriegen. In elk geval bint die supers steeds groter behuus en wordt de service steeds kleiner. “Klein mar dapper, hoe groter hoe slapper”, stik mien vrouwe de kinnebak nao veurten. Mar oh jee as ze vanuut Zaandam schrief dat ze veur zukke taal nog te klein is. Dan barg ik mien veur een dag of wat op. 

Ontvank de groetenisse van GAIT.