Gait van de Renderklippen: Kloris

Al dat mooie weer en elke dag de zunne dut de olde botten goed. Ze-k noe zelf: daor hef een mense meer schik van as een buuie règen van een wéék of drieje lank. 

De natuur dut d’r nog een scheppien baovenop. Alles gruuiten bluuit dat ’t een lieve lust is. ’t Broes de grond uut en as dat zo anhölt kan ik temee in september al de druven/droeven plukken. Alles geet net ietsies vlotte. Merie lup te zingen in ’tkaokhuus en de posbode gooien mien fluitend de brieven in de busse. Ik had al steugien terugge met mien vroggere schoolkameraod Jan ’t veurnemen uut espreuken umme bie te praoten. Hee woont zogezegd onder de rook van Amersfoort. Een entien riejen onder zukke umstandigheden, daor meug ze mien mee straffen. Ik mosse wachten töt Merie iets met de platte vrouwen had uut edokterd en kon toen ‘tspréékiezer bie de kladden pakken umme met Jan of te praoten. Hee hef naodat Toos uut de tied is eraak behoefte an praoterieje en dat kan ik mien lévendig veurstellen. ’t Magdan zo wézen dat ik Merie mien zo noe en dan verwense, mar ik zol mien zonder eur gien raod weten.
Onderweggens een cd d’r bie epak. Ene met schlagers en dan heb ik ’t niet aover de vleisboeren. Ene van Andy Borg. Nummer twee was anstékelijk. Hände hoch zum Himmel was ’t parool en ik dee-j mee zonder d’r bie nao te denken. Schut mien de voet van ’t gas op een zandweggetien. Een automobilist achter mien had ofstand ehollen. Die had de meratten van mien an ezien en was d r op veurbereid. Naodie hande in de luch kwamp d’r jodelen, mar dat dee-j ik opeen heel andere maniere. Wat een klongel. Ik stoppen, de man achter mien ok en wie heb de lol d’r an weerskanten van in ezien. Wie stunnen binnen de vuufhonderd meter van een café en daor heb ik mien redder in nood een pilsien an ebeuden. Beide met nul procent, want as iemand zonder drank zo ongeveer uut de boch vlug dan hoe ie oe niet of te vraogen wat d’r met alcohol in de sloeke veur kan vallen. Trouwens, sinds de onge jaoren zu-j mien niet met een glaassien op achter ‘t stuur zien zitten.

Luu, doet d’r kalm mee heer. Groetenisse van GAIT.