Gait van de Renderklippen: Gerommel

Hoe kunt ze ’t bedenken. Op ’t zelfde moment dat Geert Wilders in Den Haag de stekker d’r uut trök deud Ben Egberts dat in Oldebroek. Merie wil weten of dat afgespraoken wark is, mar die weet niet hoe de haze loop in de politiek. ’t Ene hef niks met ’t andere van doen. ’t Bint evenementen op zich mar dat waor Ben zich an stoort is van een totaal andre orde as datgene  wat Geert dwars zit. 

Mar zowel in Oldebroek as in Den Haag mut ze ‘t noe doen met ene petieje minder. Daor hölt n’t vargeliek ok op. Knelis mien buur zeg dat d’r in Oldebroek weinig an de hand kan wézen. “Daor volg de ene SGP gewoon de andere op”, flap hee d’r uut. 

Och lieve mensen, laot dat Tom de Nooijer niet heuren, want die beschouwt dat vanzelf as Ongeheurd Niejs.

Wie holt oe as lézer op de heugte van hoe ’t noe vadder geet in de hutte bie Tanja. Met drie man de zaken ofdoen en elk ene ietsies meer op ’t bord of d’r toch een nieje fractie veur in de plaatse met een nieje wetholder? ’t Was veurege wéke allkemaole nog te vars. 

D’r liek gien aorigheid an umme in een kleezje te zitten. Henk Wessel hef mien al is veur erékend dat de gemiddelde wetholder ’t nog gien twee jaor vol hölt. Dat geldt niet veur umzelf want hee was de man met de langste staot van dienst. Mar ondertussen is Henk zelf  ok of ehaok en bekik ’t noe van de andere kante van de taofel.

In elk geval zit d’r in Oldebroek gien nieje verkiiezings an vaste. Merie zeg dat ik ’t ok niet groter mag maken dan ’t is en dat ’t umme principes geet en daor mu-j hastik veurzichtig mee umme springen. Denk noe niet dat ze daor behoefte heb an een hogen van dse CU uut Zwolle umme de plooien glad te strieken. 

Daor liek mien Doornweerd mans genog veur. En de onenigheid zal niet op oorlog uutdrééjen met een börgemeester die vredelievendheid hoog in ’t vaandel hef staon. 

A-j d’r goed aover nao denk is ’t toch een vremde wereld. D’r zit op enig moment gien muzieki meer in en juus dan stéék ze de loftrompet uut. Zoiets as rechts deur zee. Dan hol ik toch mar liever de penne vaste, want wie schrif die blif. Zörg da-j ’t in de rie holt met mekar en ontvank de groetenisse van GAIT.