Gait van de Renderklippen: Geklongel

De grijns op ’t gezichte van Annegien vertellen mien alles. Mensen könt ’t nog zo goed met mekare veur hebben; zelfs en veural dan kan ’t scheef lopen. Dat dee-j ’t bie ons veurege wéke.

Scharven brenk geluk, ze-k ze en ik wil niet zeggen dat ’t in dit geval ongeluk op de Klippen hef veroorzaak, mar een pienlijke ervaring dat toch wel weer.

Naodat ik de dekkel van de theepot had laoten barsten zörgen Merie d’r veur dat de hele pot nao zien grootjen ging deur ‘m uut hande te geven op een stenen vloer. En die wis daor wel raod mee. Zoas dat in een goed gezin heurt was d’r nog een reserve met wat scha zo links en rechts mar die nog goed te gebruken was en waor de thee die d’r uut kwam niet minder umme smaken.

Veurege wéke dan was d’r weer ene van die veule veurjaorsmarkten. Ik heb daor niet zoveule mee, mar de vrouwluu lus d’r wel pap van. Merie dus d’r op of. Dat gaf mien de gelégenheid umme op ’t darp in de boekhandel rond te neuzen. Op weg d’r nao toe kwam ik langs vast goed, ik bedoele goed wa-j vaste kunt hollen en wat een mens van passe kump in de huusholling. 

Een speciale kottingsactie op serviesgoed. Dat kwam goed uut. Ik praoten een theepot lös van de res van ’t spul en gunk d’r mee op huus an. Daor zollen de beide dames van opkieken.

Gien gedoe d’r mee: de niejste anwinst midden op taofel. Dat viel gewoon niet te missen. Effies later keren de beide dames op ’t honk terug.

“Zo”, zei Merie, “Ik heb lange genog tegen die sloeterkanne an ekeken”, en zetten iets naos mien anwinst op de taofel. 

Mien slimme dochter begun vals te lachen. Die hef altied metene deur wat d’r onder de verpakking schuul geet. Zo ok in dit geval. En ja heur, daor kwam de tweede theekanne van disse mâârn te veurschien. 

Dan wil een mense goed doen en kump e met een theekanne op de koffie. Toch viel d’r veur mien nog wat te lachen. Want hoewel de gulden en ik denke noe ok de euro op de markt een daalder weerd is pakken dent van mien nog ietwat goedkoper uut. Mar bie mekare op eteld was ‘t vanzelf veur de firma een schadepos. In elk geval is d’r noe een oplössing as d’r ene van ons weer wat uut de hande löt vallen.