Gait van de Renderklippen: Klerestreek

Ik wil niet zeggen dat ’t in elk darp en iedere plaatse ’t geval is, mar ’t kump wel steeds vaker veur dat de trottoirs uutstalruumtes wordt van de kruujeniers.

Ja hoho, niks tegen de middenstand in huze Gait, want die mut ok knap- sabbelen umme an de kost te komen. Mar veiligheid veur de voetgangers steet veurop. Somtieds mu-j tussen de spullegies deur scharrelen. Da-s met een rollator bienao gien doen. 

Mina van ons naos is kottens al lankuut egaon met de neuze in de rolgordienen. Knelis, eur man, hastik hellig. “As ze met de winkel wat tekort komp, druk ze van ’t ene op ’t andere moment d’r wat bie op. Dat hoef ik met de eier en de melk niet te lappen want dan bin ik an de beurte”, gromp hee. Dan hol ik mien gedachten mar veur mien. Wie heb bie de krante de kruujeniers hard neudig veur de inkomstenkante, mar Merie gif Knelis toch niet helemaole ongeliek. Die mark ’t vanzelf bie de bosschappen.

Terug nao de pruttel op ’t trottoir. Och, ik loop as ’t helemaole vol wordt een stukkien umme. Dat könt luu die slecht uut de voete komp niet, besef ik mien.

Veurege wéke kreeg ik d’r toch mee te maken. Ik liepe deur ’t darp en kon bie een kledingzake gien tred meer zetten. Op de helfte van ’t voetpad stunnen jörkies en rokken uutestald. Ie zult zeggen dat d’r dan nog een helft aover blif. Op zich heij-daor geliek an, mar as oe ’t achterende van de rugge in de XXL stand uut völt dan is ’t toch schuven of schoeven, net a’j gewend bint umme ’t te benumen. Net veur mien stun d’r een vrouw in dat grei te trekken. Ik wachen netties tötdat ik wieter konne. Nou, dat hiel nogal an. Umdat ik op tied ok nog medicijnen op mos halen heb ik toch mar de mond lös edaon.  “’t Völt niet mee umme een keuze te maken mevrouw”, gooien ik d’r uut.

Ze drééjen zich umme as deur een wespe esteuken en zei: “Veur oe is d’r in ieder geval niks bie.”

Dank oe de koekoek, ‘t was allemaole damesmode wat daor liep te fladderen. Ik hebbe mar niks meer ezeg, heb mien langs eur ewrungen um de vrouwe in kwestie an eur trekken te laoten komen. Ie meug met mekare uut maken wie wie noe een klerenstreek hef eléverd.

Groetenisse van GAIT.