Gait van de Renderklippen: Kater

Ik weet niet hoe ’t oe geet, mar ie bint ‘d’r a-j ’t goed wilt doen een dag mee bezig umme alle verjaors- en bezundere dagen op te schrieven. Want onthollen daor is gien beginnen an. A-j denk da-j klaor bint heb ze d’r weer een niejen an toe evoeg. Vrouwluu bint d’r alderkeizers gevulig veur en veur da-j ’t oe besef hei-j de kat in de gedienen.

Ik bin niet opegruuid met Valentijnsdag. Dat is d’r in februari meer ene veur de kouwe kante zo-k zo zeggen. Mar Merie had wel actie verwach en dat liet ze mien op eur eigen wieze marken. 

Weet ie wat, Gait, hiel ik mien veur: ie doet ’t op oew eigen maniere, buten de hele wereld umme. Een partnerdag. Want moeder- en vaderdag is wark an de winkel veur Annegien.

Ik heb of ewach tötdat de zunne ’t van Pluvius begun te winnen en ’t veurjaor de winter vot jagen. Want de vrouwe had al een keer of wat laoten deurschemeren dat ze an nieje stoelkussens toe was. Die d’r lagen zaten niet lekker meer. Nao een lange middag vulen ie ’t dikste ende van de rugge en stun ie stiever op dan da-j waren gaon zitten.

Veur dat soort dinge nemme ik Annegien in de aarms. Die ontfutselt eur moe de favoriete stof en kleur. Toen De Bilt veurege wéke veur elke dag temperaturen van dikke baoven de twintig an gaf heb ik toe eslagen en vuuf mooie kussens an eschaf. Vuuf maonde nao Valentijn, dat kwam mooi uut.

Ik hebbe ‘s aovens ‘t spullegien op de banke eleg met een briefien waorop de tekst van béter late dan nooit. ’t Plastic d’r of en ’t briefen d’r op.

Merie is een vrogge vogel, die dut de deure lös en ik hadde de kussens strategisch neer eleg. Ze was nog gauwer weer binnen as buten en ik krege een lading aover mien heer dat ’t niet mooi meer was. 

“Wie löt noe in vredesnaam niej spul zo open en bloot liggen soeze?” Ja, ik kwamme d’r achter dat de poes van de buren zich ‘s nachts te rusten had eleg op mien koopwaar. ‘t Briefien had e nao zien grootje ehölpen. En zo worden de poes veur Gait een kater. Dan is d’r altied nog Annegien die ‘t veur mien op hef eneumen. Ik krege twee klaossies bie de koffie dus de bosschap is goed an ekomen. As de muzen van huus bint dans de katte.