Gait van de Renderklippen: Verrinneweerd

As ’t veurjaor anbrik dan maak dat niet allenig veur ’t vrouwvolk iets lös. Ok de mansluu vlug ’t an en zet de krane open veur een niej begin. Dit jaor nog met een hele pietse zunne d’r aover hen. A-j  wilt verniejen dan mu-j wat van ’t olde priesgeven.

Dat is zo klaor as een kluntien. Daor waor Merie fanatiek an ‘t poetsen, boenen en dweilen gunk worstelen ik mien deur de stapel pampier die zich in de loop van ’t jaor had evörmp. Wie heb beide een manie umme alles vaste te hollen. 

Daor mos ik dus mee gangs. Alle stukken van de geiten fokvereniging konnen vot, want die club is d’r al lange niet meer en wat mu-j d’r dan nog mee. De vrouwe had d’r schik van dat ik ok deur ’t veurjaor an esteuken worden. Tussen neus en lippen deur kreeg ik ’t commando umme een stapel olde pruttel van eur vrouwenclub ok in de shredder te smieten. Ie begriep ‘t wel: dat is Hooghaarlemmerdieks veur een pampierversnipperaar.

“Links in de hoek”, zei ze nog in ’t veurbie gaon.

Tsjonge, wat hölt een mense dan toch een spul vaste wat buten onze deure al gien weerde meer hef. 

An ’t ende van de middag waren wie bek of en was ’t de hoogste tied veur een bakkien.. 

“Zo”, zei Merie, ie heb’t kantoor d’r lichte van emaak. Dat prutteltien van mien had ok gien enkele weerde meer. ”Hei-j alles links mee eneumen?” Dat had ik. In ene keer vleug ze uut de gemakkelijke stoel en worden wit um de neuze. “Oh Gait, onderop lagen de brieven die wie mekare heb eschreven in oew diensttied. Die hei-j toch wel laoten liggen?”

Nee, dat had ik in mien onwetendheid niet edoan. Merie mos d’r van  snottern. En ik hadde ok gien schik meer. D’r lagen nog twee blaagies die nao de koffie nog versnippert mossen worden. 

Ze  gungen aover ’t ofzwaaien van de militaire dienst. Noe had Merie mien weer de hele wéke veur zichzelf schreef zee. 

Daor is ze in de loop van de jaoren wel achter ekomen, mar op dat moment waren wie beide hastik blie met ‘t epistel. Een smuksien zetten daor een stempel op. Ofzwaaien van disse verbintenis wilt wie nog graag zo lange meugelijk uutstellen.