Gait van de Renderklippen: Krééje

Ik lope niet aover van benul as ’t umme de gevleugelde vrienden geet. Krééje, ekster of roek, valt d’r mien niet mee lastig. Mar één ding is zeker: de fladderende zwátten die ’t sinds een dag of wat op ons begrepen hef maak d’r gien half wark van.

De krééje, Annegien weet ’t zeker, vlug bie ons in en uut. Hastik vervélend,want ’t is een stofboel as gevolg van een nieje keuken die Merie mien uut de knippe hef epraot. De vogel hef al een keer of wat bie ene van de mannegies in de nek ezéten. 

Wie heb net as een minister van de wéke een streep in ’t zand ezet, al had dat met kats wat anders van doen. D’r kwam een ende an ons geduld toen ’t bees via de keuken bie mien ’t kantoor binnen vlaog en in stukken begun te pikken. Merie menen dat de concurrentie de vogel hef in ehuurd umme mien primeurs weg te pakken. Mar zo sprink wie op de Noordwest Veluwe niet mekare umme. 

’t Worden nog gekker toen de krééje in de kaste met fiscaliteiten gangs ging. Zool d’r ene van de belasting achter zitten? Umdat ik ‘m lelijk an keke hef e de vluch naor de woonkamer eneumen en daor flinke scha veroorzaak deur umgesmeten glaswark.

Merie hef de indringer met bessem en stofzuger de deur uut e bonjourd. Ondertussen was Gerrit, die name kreeg e al gauw in de veren escheuven, de schrik van de hele buurte eworden. Deuk mensen in het haor op de fietse, pikken spullegies van de taofel en halen mien zelfs de theelépel uut ’t köppien.

Bie de buurman hef Gerrit stoete van ’t bord epik en bie de buurvrouw an de andere kant van ons huus worden iets op de verkeerde plekke bemest. 

Tja, de krééje blif komen ok al hef hee ondertussen concurrentie van een steenmarter die ok van vernielen weet.. Bie Jan an de aoverkante hef die maot rubberen slangegies an evréten en dan stao-j ok mooi te kieken met een autogien da-j niet kunt gebruken.

Wie holt noe de deuren en ramen mar dichte tötdat eigenaar van Gerrit zich hef emeld. Een hard gelag trouwens, want noe wilt de muren niet goed dreugen. ’t Zal hopelijk niet duren tötdat Gerrit de krééjenmars hef eblaozen.

Doet d’r kalm met heer en ontvank de groetenisse van GAIT