Gait van de Renderklippen: Heibel

Merie hef vinnig de smoor in. Eur inspanningen umme de natuur een hantien te helpen is op niks uut edrééjd. Ze maak zich al een hele tied zörgen umme de achteruutgang van de heide op de Renderklippenj en die tussen Ermelo en de Klippen. As ze daor aover bezig geet wordt ze nog paorser dan de hei in jaoren is ewes. Um daor iets an te veranderen schreef ze briefien nao ’t Kammenet in Den Haag nog veurdat ze daor veur dag en nacht bie mekare kwamm.

Ze hef ’t hele spul eneug umme op de Noord- en de Noordwest Veluwe de boel te bekieken en vrindelijk mar dringend an edrungen umme een  bettien geld  vrie te maken veur ’t afplaggen zodat wie allemaole temee weer kunt genieten van een uniek stukkien natuur. ’t Kos een paar cent mar dan hei ok wat, zo hef ze de politiek veur ehollen.

Wie weet inmiddels waor de griepstuvers nao toe gaot. Niet nao ’t verbreden van de weg nao Kampen. En al helemaole niet nao ’t opknappen van de heidevelden in disse regio.’t Gevaor da-j oe op weg nao de polder vanof Oldebroek te pletter riejt is onmundig groot. ’t Blif noe de weg van Krampen en Verdampen. Net as Den Haag mu-j d’r noe met een grote baoge um heer. 

Volges Merie heb Wilders en Ko egees niet nao eur brief umme ezien. Ze is grammieterig  en zo ontstemd dat ze van stemmen al helemaole niks meer wil weten.

Trouwens de bevestiging dat ze zich in ’t Haagse niet met de smeekbede van de Klippen bezig heb ehollen kwam via de pos. Onbesteld retour zo as ze dat nuump. ’t Kammenet in Den Haag was niet dudelijk genog ewes.

Nao een dag of wat heb ik de olde Merie weer terugge. En rékent d’r op dat Schoof met de Veluwse natuur niet an ’t schuven kan blieven. Börgemeesters in de buurte, bereidt oe d’r mar op veur da-j vandaag of mâân Merie van de Klippen op de koffie krieg. Ze wil een petietsie umme ’t zwikkien in ’t westen mores te leren. Ik kan eur d’r niet van of brengen. Wat dat oplevert is gien hei mar heibel. As ik een vargeliek make tussen een luchbel en heibel dan trek d’r een schoer aover de schaopskudde. Luu, ik hol oe op de heugte. Ik haope da-j de Paosen goed verteerd heb. Ontvank de groeteniss van GAIT.