Gait van de Renderklippen: Landpikkertien

Disse krante hef laoten blieken dat ze de behoefte an vrede hoog in ’t vaan hef staon.

Juus deur al die verhalen te bundelen aover de ellende die-w noe gelukkig tachtig jaor achter ons heb liggen. Ik heb d’r niet an mee edaon mar dat is volges Merie vanzelfsprékend umdat ik zelf al een stuk lopende geschiedenis binne. Baovendien heb ze bie de krante een redactie die daor heel goed mee umme kan gaon. Ik wil d’r mar mee zeggen da-j ’t buukien waorin al die verhalen staot ’t beste mar metene kunt anschaffen veurdat d’r temee ‘uutverköch’ op de deure steekt.

Tachtig jaar gin angst in de klungels, gin onderdrukking en andere smeerlapperijen. ’t Is te haopen daww hier umme te beginnen nog is tachtig jaor an vaste kunt knuppen. Mar met alles wat umme ons hen gebeurt, is dat lange gien zekerheid. 

En as ik d’r noe zo is aover naodenke dan vin ik dat ’t buukien van de krante ’t beste ok mar in ’t Engels en in ’t Russisch vertaald zol mutten worden. Ie snap ‘m wel: dan kunt ze ’t in Elburg op de pos doen naor ’t Kremlin en naor ’t Witte Huus. 

De direksie is mans genog umme d’r een epistel bie te doen. Trump en Poetin d’r an herinneren dat ze dik tachtig jaor eleden samen veur vrede heb evöchten, wat onmundig veule slachtoffers an beide kanten hef ekos. In Trump ku-j de Amerikanen van toen niet terugge vienden.

Mar die wil in elk geval nog op vrede ansturen al krup hee daorveur wel een dictator in ’t achterwark.

Poetin maak d’r noe een groot spektakel van dat ’t tachtig jaor eleden vrede is eworden deur zien mensen en voert gelieke een verschrikkelijke oorlog in de Oekraïne. Dat zol in de brief van de directie kunnen staon. Landpikkertien speulen wie vrogger op schoele, mar wat hee dut is gien spel. Een kwestie van weten en geweten. Misschiens dat ze dan in ‘t Kremlin d’r aover nao gaot denken. En a-j vaste stelt dat een buukien in ‘t Russisch een bonke geld kos dan begriep ik dat. Mar met een dictator die geet naodenken kom ie een heel ende. Die brenk dan vanuut Moskou wel de neudige poet in. 

GAIT.