Gait van de Renderklippen: Armlastig

As de teller van oew jaoren een ende aover de vuuftig hen schut dan kos ’t meer en meer muuite umme an nieje dinge te wennen. Dat is op de Renderklippen niks anders. Mar somtieds sprink een mense toch aover de hechting an ’t olde vertrouwde heer.

Dat aoverkwam mien kottens toen Merie en Annegien in koor vaste stellen dat ’t noe net iets veur mien was.

Ze hielen mien de krante veur de neuze waorin ze luu opriepen umme zich beschikbaar te stellen veur een wedstried in dirigeren.

In dit geval van de Harmonie. Ze mossen d’r drieje veur hebben. Volk dat ’t niet in de broek deed umme veur een orkest te staon en ze de maote an te geven. Ik wil niet zeggen dat ik muzikaal bin as de lanteernpaole bie ons veur ’t huus, mar dat ik d’r in thuus bin is weer wat anders.

Mien opa en een ome waren ooit met een grote toeter steunpilaren veur Sempre Crescendo, mar dat wil nog niet zeggen dat ik ’t in de genen hebbe zitten.

Ik heb mien de kop gek laoten maken deur de beide vrouwluu, die mien heb an emeld veur de wedstried die in juni worden ehollen.

Ik wol vanzelf niet afgaon, heb een knuppel uut de schuur ehaald en bin de kamer an ’t oefenen egaon. D’r was een vrie nummer en ene die-j op de dag zelf veur de koezen kregen. 

Ik keuze veur marsmuziek. Koning Voetbal. In eerste instantie Heidewietska mar daor wol Annegien niet an.

Wie bint met zien beiden in de kamer an ’t meratten ewes. Merie kwamp tussen beide toen wie met de knuppel op een haor nao de grootste schemerlampe van de taofel hadden evéég. Ik heb ewacht töt de beide dames de jach op bosschappen deuden en bin toen veur mienzelf bezig egaon. Ik heb alles heel elaoten met uutzundering van de rechter arm. Machtig wat een piene. 

Toch mar nao de pillendrééjer. Die was d’r al heel gauw achter. Slijmbeursontstéking! D’r zat veur Gaitman gien meziek meer in. Ik hebbe de nominatie dus deur de deerns in moutten laten trekken wegens armlastigheid. Mar misschiens blif mien noe ok een hele bonke vernedering en spot bespaord. Met paosen de eiers links mutten pellen mar as ‘t broerder niet is…