Gait van de Renderklippen: Trampen

Keerl keerl wat een weer de leste dagen. Wat dut dat de olde botten goed. Merie geet zingend met de wasseldoek aover ’t anrech. Veurig jaor zo-j op de Klippen bie toeren töt an de enkels in ’t water: noe m u-j een halve meter de grond in umme nog wat nattigheid te vinden.

’t Gebeurt niet vake dat Merie mien neug veur un ummegien langs de schaopen, mar met de zoveulste zunnige dag deed ze ’t toch. Dat sinds de verkeringstied gien tien keer meer veur ekomen nao mien weten.

Wule heb veule zinnigheid ehad an wat d’r zo dich bie huus allemaole te beléven is. Alles broes de grond uut. De vente (kienders) allemaole op straote an ’t joechteren. Op een veltien bie de domieneer waren ze an ’t voetballen. Dat ging d’r vinnig op. Ja, en ik weet niet hoe ’t uule/oe geet in zukke umstandigheden, dan krie-j de kriebels umme een petiegien mee te trampen. 

Merite schuddekoppen, die zag ’t al zo veur zich. Effies later niet allenig in gedachten. Dat was toen de balle al een keer of wat bie de predikant in de veurtuin tussen de blumegies was eraak. Toen dat veur de zoveulste keer dreigen te gebeuren halen ik de klompe an….Och, mien lieve mensen, de hof worden espaord mar de knikker vleug met een grote baoge in de slaopkamer. 

Merie in alle staoten, de vente waren niet meer stille te kriegen. “Alle zegenen komp hier van baoven”, zei de brutaolsten van ’t spul. Nou, ik verwachten wel iets van de baovenste verdieping mar bepaold gien pluumpien laot staon een zegen. 

Merie stiefelen nao de belle en liet de vrouwe van de domieneer in geuren en kleuren weten wat veur stoethaspel van een keerl as ze ’s nachts naos zich in bedde hef liggen. Daor was gien woord Spaans bie. Mar gelukkig hei-j ok vrouwluu die ’t in een breder perspectief kunt zien. “Zee gooien de bal nao beneden en zei dat ome Gat strafregels mos schrieven.” Merie knikken d’r bie as een hijskrane. 

Bie de jongens kan ik gien kwaod meer doen, mar d’r zal meer tied aover heer gaon veurdat ik weer met de vrouwe an de wandel gao. Veur straf gien voetbal meer op ‘t loerglas.

De groetenisse van GAIT.