Gait van de Renderklippen: Strukelpartie

De regio is mien jachtgebied, mar dat weerhölt mien d’r niet van umme vadder te kieken. Aover de grenzen van de Veluwe, van Nederland en van Europa. Met dat loerscharm veur de neuze hef dat ok niks te betekenen. Ik bin vaste niet de enigste die zich hef zitten argeren an ’t GeTRUMPetter van de man an de andere kante van de grote plas. 

’t Hef d’r veule van weg dat hee samen met zijn maot Poetin temee ’t hele Europa wil verdelen, te beginnen met Oekraïne. Ik maken mien gloepens hellig toen hee Zelensky onderuut halen en um de Dadde Wereldoorlog in de schoene scheuf. As d’r noe ene is die met ’t gemattel aover handelstarieven, ’t geruzie met China de boel zit op te drééjen dan is hee ’t wel. Wie bint in Europa met zo ongeveer vuufhonderd miljoen man en Amerika hef d’r niet meer dan 340 miljoen en Rusland nog gien honderdenvuuftig.

Ik bedoele mar: aww met mekare de arms uutstéék kwak wie ‘t hele spul tegen de vlakte. Mar dat zit niet in ons. Amerika hef ons nao de Tweede Wereldoorlog aoverend ehölpen en vanaf dat monument heb wie verstoppertien espeuld en ons ondergeschikt emaak. Bie ’t geraos van Trump en zien vieze president, ja ik wete da-j dat anders mutten schrieven mar ik volg mien hatte, bleef alles in de kamer nog net aoverende al maken Merie zich niet helemaole ten onrechte grote zörgen.  Mar ’t gunk verkeerd toen Rutte as grote baas van de NAVO liet weten dat Zelensky zien excuses an Trump mos maken. Ik mene eers nog dat mien heurapperatuur geintien uuthalen, mar toen de NAVO-baas ’t nog een keer aover deed, sprong ik aoverende, viel aover de poef van de vrouwe en verzwikken de rechter enkel. Ik wete niet wat pienlijker was: de woorde van onze veurege minister president of ’t verstuukte been. 

Merie schuddekoppen en zei niet te begriepen wat de Renderklippen hierin noe had te betekenen. “Laot wie de echte wolven mar buten de draod zien te hollen”, menen zee. Effies later kwam d’r nog wat achteran. “Weet ie Gait, ie bint te vlot ewes met oe gestrukel. ‘t Had temee naodloos epas in De Zwikmeule….” Toen lachen d’r ene as een boer met koespien.

Groetenisse van GAIT