Gait van de Renderklippen: Prutteltien

Stel oe noe toch is veur dat de buren links van oe en die an de aoverkante samen uut maak of ie een stuk van de hof in mutten leveren? Zo effies tussen deur aover de kletsdraod. In veul groter verband is dat noe precies  t geval met Oekraïne. De nieje olde president van Amerika hef kontak op eneumen met zien maot in Moskou en ’t kump d’r op neer: wie nemp met zien beiden de Poet in. 

Ie zollen toch gelieke aover de hegge springen en ze links en rechts bie de kladden griepen. In wat veur wereld bint wie verzeild eraak dat twee machtswellustelingen effies tussen neus en lippen deur aover de lévens van miljoenen mensen beschik. Europa hef zich nao de oorlog in de nesten ewäärk, mag noe opzitten en peuties geven.

Rutte denk d’r nog met een lollegien op ‘t Witte Huus mee vot te komen mar as ’t Trump in de kop schut dan mééjt hee met ene pennestreek de hele Navo tegen de vlakte. 

Merie en ik li-k d’r wakker van. 

Effies deur de tillefoon ’t volk in Oekraïne opdelen: de ene met ’t land d’r vandeur en de ander met de schatten die daor in de grond zit. 

En Merie zut ’t allemaole nog slimmer uutpakken. 

“Weet ie Gait, Trump löt Poetin temee weer de baas speulen in Oost Europa en zelf hengelt hee West Europa nao binnen.”

Dat is volges mien wel heel kort deur de bocht, mar dat ’t de hoogste tied is umme die beide dictators an te pakken liek mien wel heel arg veur de hand te liggen. Europa mut een vuus maken, laot Hongarije dan mar bie Moskou onder de dékens krupen, en met zien zesentwintigen muww an de bak. En dat ku-j niet met knappertiespieisteulties. Bie de Pruus heb ze dat béter deur. Die sprink aover een stuk ellendige geschiedenis heer umme de mense nao ons toekomst te bieden,.

“Wie mutten ook wat doen Gait. Ze blief met de hande van de Vriestaat Renderklippen of. Weet ie wat, ik fietse temee de Knobbel aover en gao is informeren of ze bie de ASK nog een tank aover heb die wie bie ons veur de deure zet. En as d’r dan zon gladdekker van Poetin disse kante uut kump is ’t met um welterussen…..” 

‘t Zal zon vaart niet lopen, mar dat denke wie al tachtig jaor. Tied veur: heidewietska, veuruit geef gas. 

Ontvank de groetenisse van GAIT.