Gait van de Renderklippen: Krange

Ie heb van die dagen waorop ie ’t liefste nooit meer terugge kiek. Daorvan had ik d’r veurege wéke ene. Een bettien sloerig in de rakker, mar net niet broerd genog umme in bedde te blieven.

Ja  en dan zu-j net zien dat de wederhelfte daor gien begrip veur hef en oe ok nog an de kop zit te drammen.

Ik mosse mien schamen zoas ik d’r bie liepe met een paar schoenen die nog te smerig waren umme d’r mee in de hof te banjeren. As oe dat een keer of wat veur de voete wordt esmeten dan bi-j d’r mee klaor.

Ik mosse nao een uutleg aover internet, greep een paar zundagsen uut de kaste en vot op ’t darp an.

Onderweggens Merie an de handsfree tillefoon. Ze was alderkeizers korf of. “Kiek is nao de voete”, en ze hing weer op. Ja, dan mu-j nog goed uutkieken want in een tel zit ie op de verkeerde weghelfte of nog arger. Mar een half oge was genog umme te zien dat ik linkst een brune schoene had an etrökken en an de andere kante de versmeerde rechtsen.

Och lieve stumper, wat ziet ie dan in de piepzak.  Heel veurzichtig bin ik bie ’t gruupien van de computerles an escheuven met de voete diep onder de taofel. En toen ok nog de vraoge of ik ’t effies veur wol doen op de grote computer van de instructeur. Ik heb mien daor uut weten te drééjen, mar ze hadden allemaole wel deur dat ik daor niet op mien gemak zatte.

Ik bin pas op estap toien zowat iederene vot was. Ze heb mien niet betrap, mar ik zal d’r volgende wéke wel las van kriegen want ik hebbe van de hele kursus gien komma onthollen.

Ene keer thuus kreeg ik de volle laoge. Ie kent dat wel Soeze….kleurenblind….dat soort woorde. Ik worden niets en hebbe de schoensmeer deuze epak umme die vervuulde zwátten een beurte te geven. Mar ik hadde nog steeds de kop d’r niet goed bie. Net veurdat ik an ’t smmeren wol kreeg ik van Merie een tik aover de vingers. Brune schoensmeer op een lappe veur zwátte schoenen. Ie kunt oe veurstellen dat ’t d’r toen nog effies flink heer ekalebaterd hef op de Klippen. Affein, ik bin weer bie bloed.

Groetenisse van GAIT.