Gait van de Renderklippen: Soeze

Een mens blif een mens en een man blif een man. Dat is de moraal van dit verhaal. Een nééfien van Knelis mien buur op de Klippen kan händig umme gaon met een balle. Hee zit in ’t eerste en schup d’r de de ene nao de andere goal in. Niet zo verwonderlijk dus dat Knelis dat rond streujt en daor trots op is.

Hee kwam bie ons op de koffie met de vraoge of ik bie de volgende thuuswedstried met um mee wol gaon, want dan zol Henkie, zo heet dat talent, an zien zuupotters laten zien wat hee allemaole in huus hef.

Ik bin niet een grote fan za-k mar zeggen, heel anders dan ’t Meneertien van de Krante die d’r wel pap van lus. Mar een goeje buur is béter dan een varre vriend dus ikke mee op ’t sportpark an.

Ze hadden d’r wark van emaak. Veur de wedstried een stel jonge deerns in korte rökkies met veule veren die een show opvoeren. D’r stun nogal wat wiend en dan hoef ik niet uut te leggen waor dat op uutdrééjen. Een man blif een man en Gait blif Gait. Ik halen de zaktillefoon d’r bie en maken gauw een petrettien veur ’t thuusfront. Dat was ik althans van plan mar ik was misschiens toch te veul onder de indruk, want dat kletsding scheut mien uut de hand en viel diepe weg onder de tribune.

Alderkeizers nog an toe wat een ellende. Meters onder mien zag ik ’t apperaat liggen, mar hoe kom ie daor bie. Ik hebbe mien in allerllei bochten mutten wringen umme in dat gat te krupen. Een keer of wat heuren ik ’t volk baoven mien schreeuwen, mar dat ging kats langs mien heer. 

Net toe ’t of was kwam ik weer baoven de grond met ’t zweit op de kop. Nao afloop kwam Henkie nao ons toe. Hee had twee doelpunten emaak en wol van ome Gait weten welke of die noe de mooisten vun. Ja, daor stao-j dan met de breuk uut. Ik heb d’r niet bie nao edacht en zei : de grondbeginselen! ’t Viel nog goed ok za-k oe zeggen, de meesten  zollen de pienantie hebben enuump die d’r via beije posten in ging. Mar nee, Gait keek daor dus dwars deur heer. Een pienantie? Man hol op. Ik was al veuls te veule bezig met de strafschop die mien te wachten stun met de broek te hetter en te fletter.

Maak d’r een mooie wéke van en ontvank de groetenisse van GAIT.