Gait van de Renderklippen: Deurzetten

Albert is onderwiezer mar tegelieke ok van baoven wijzer. Dat uut zich bie um in ’t umme zien nao de medemens en niet zon klein bettien ok. Hee grossiert in ’t vriewilligerswârk. Is veur ’t ene de deur nog niet uut of hee mot de jasse al weer an veur ’t volgende.

Hee is umme in ’t onderwarp te blieven alle dage Present. ’t Maak um niet uut waor de hulpvraoge vandan kump. As d’r ebeld wordt of op de deure eklop dan stee thee open. Veural de nieje Medelanders heeft al veule profijt van um ehad al zut hee dat zelf heel anders. ’t Heurt d’r gewoon bie. Albert gif honderdenéén procent mar dat slut dan weer op zien lessen in ’t menselijk lichaam op de schole. Ene van die vernemstige vente kwam d’r achter dat hee bie ’t optellen van alle procenten an botten en bloed an honderdenéén procent kwam. Mar ’t hölt dus niet allene bie ’t lesgeven aover: dat dut ’t ok bie de naostenliefde.

Toch ku-j daor ok nog weer mee te passe komen zoas hee kottens twee keer achter mekare hef emârk. Eerst bie hulp an een Sloveense vrouwe, waor hee met een stel maoten ’t huus veur inrichten. ’t Mense was aldergloepens dankbaar en maken veur de mansluu een hele bonke Sloveense rolletjes. Ik wet niet of ie d’r een benul van heb hoe stank dat spul is mar Albert kan ’t oe vertellen. Die had een nacht lang van Sloveense drolletjes….

En een dag of wat later bint de keerls nerig ewes in de hof bie een Syrische famielje. Ok weer hastik bliede mensen. Albert zag bie de thee in de huuskamer een grote waterpiepe staon. Toe de Syrische huusbaas dat marken worden de vier wruters in de hof samen met um in een kringe ezet en eneug umme met mekare an die piepe te lörken. Hee vroeg op zien Syrisch wat d’r in mos. Ze knikken mar van ja bie al ’t grei wat hee ze veur de ogen hiel. Och, lieve mensen, op weg nao huus begunnen ze al te hïemen en de hele nach die daor op volgen blökken ze alles an mekare.

’t Zal Albert d’r niet van weerhollen umme de hande uut de mouwen te stéken, mar hee is zich al wel gaon verdiepen in de zeden en gewoonten van de ummelanders.

Groetenisse van GAIT,