Gait van de Renderklippen: Oordöppies

Naogenog iederene krig d’r wel is mee van doen: verhuzen! Dan kom ie d’r achter wat een grei da-j allemaole heb binnen eslep wat wieter veur de res gien weerde hef. Dat is bie Jan  van de Dialekmaffia niet anders. Hee is vinnig an ’t uutventen ewes en hiel toen nog een vrach aover die hee in zien nieje umgeving niet kwiet kon. Ja, dan is ’t passen en méten tötdat een mense d’r onpasselijk van wordt.

Jan steet d’r umme bekend dat hee graag elk mensen wil helpen die arges mee in de mage zit. Ie kunt um d’r midden in de nacht veur uut bed bellen. En al helemaole as de luu de moerstaal spréék, want daor zet hee zich ommundig veule veur in. Komp um niet an de streektaal, want dan gif hee oe van katoen.

’t Is veurnamelijk zien verdienste dat ze curussen in ’t dialect doet waor ok börgemeesters niet an ontkomp. “A-j een darp goed wilt leren kennen en wilt weten wat d’r speult dan ku-j daor niet umme hen”, is zien devies. 

Goed as ene vaste hölt an’t Algemeen Beroerde Nederlands, an ’t Hooghaarlemmerdieks, mar de oren dichte drukken veur de taal van de streek, dat geet um veus te varre.

Mar terug naor de verhuzing. De hof was um te groot, ’t huus te bewarkelijk, en nao lange wikken en wégen hef hee zich in eloot veur een appartement. Mar ja, daor kan niet de helft zoveul in en vandaor ’t gemättel umme datgene mee te kriegen wat hee niet kwiet wol.

D’r viel nogal wat an te knooien. Nieje keukenvloere, andere douche en meer van dat gedoe. Ie snap wel dat ’t weghalen van ’t olde spul en ’t anbrengen van niej grei niet zonder lawaai geet. En zien umgevung aoverlas bezörgen is niks veur um. Mar naodat hee d’r met zien Jannie een nachien aover had eslaopen kwamen ze d’r uut. D’r mankeert niks an wat hee onder de pette hef en baovendien hef hee in eur een vrouwe in huus die meester is in ’t prakkedenken. Bie elk ene in de flat heb ze een handvol oordopjes en Merci in de vorm van chocola in de brievenbusse estop. Met een aorig briefien met verontschuldigingen veur ’t anstaonde ongemak. Heuren en zien is ze daor een dag of wat vergaon mar gien mense die zich daor druk umme hef emaak. Een Janboel van de allerbeste soort. 

Groetenisse van GAIT.