Gait van de Renderklippen: Snertzeugien

’t Kan een mense niet altied veur de wiend gaon. Bie toeren zit pattie luu de wiend flink tegen. Ene die d’r flink van mee kan praoten is de petrettieskeerl van onze eigenste krante. Ie weten misschiens nog dat hee kottens zien foto apperaat onder de smurrie had toen hee met ’t breedste deel van de rugge op een banaan ging zitten en meneer zelf de pisang was.

Dat was nog mar kinderspel bie wat um veurege wéke is aoverkomen. Ineen tiedsgwricht wa-j met recht een snertwéke kunt numen. Twee keer nao Doornspiek; ene keer met een gevuul van gelukzaligheid weer op ’t Harde an en de andere keer zo neerslachtig as een dromedaris die ’t al een half jaor lang niet meer zut zitten.

De eerste keert gunk ’t umme een snertéterieje en daor lussen hee wel pap van. Net zoveuele worst as ââten en daor ku-j mee veuruut. En dag of wat later mos hee in de kelte an de draod zitten bie de voetbalwedstried tussen Doornspiek en ’t Harde. In vrogger dagen gunk ’t um ’t gemeentehuus, mar dat steet noe alweer een jaor of wat in Elburg sinds de polietiek plaatsen op ene hoop hef egooid.

Of hee nog slap in de bene was van die snert, wie ’t weet mag ’t zeggen, mar hee kwam pas kort veur de oftrap de bestuurskamer binnen. Ze tapt bij DSV61 de koffie gratis in mar onze man kwam buten der schuld van iederene op de koffie. Hee hef altied een hele pruttel an de scholders hangen umme dat wat d’r op ’t veld veur völt goed aover te brengen. Mar toen hee de koffie reuk is um zien duurste apperaat van de scholders evallen. 

Ze ze-k in de streektaal wel is net elens as ze bedoelt dat ’t niks uut maak, mar in dit geval was ’t net de lens die te hetter en te fletter viel. Duzende euroos scha en dan mut de wedstried nog beginnen. Dat hee met een zoer gezichte an de zielijn zat had niks met ’t matige voetbal van doen, zo a-j kunt begriepen. Nog niet zo heel lange geleden heb ze zien maot, ’t Meneertien van de Krante, twee keer op de parkeerplaatse zien auto in mekare ejach. Ku-j oe veurstellen dat de vrouwluu van die beiden zich afvraog of ze wel wies in ’t  heuf bint? Kolde botten en rood op de banke. Mar de bal mut rollen.

Groetenisse van GAIT.