Gait van de Renderklippen: Blaoskaak

Zo kort veur de Kerst maak ik melding van twee acties, waorvan d’r ene straol is misluk en de ander mien met wat misplaatste bliedschap opzadelt.

As Meneertien van de Krante, de name waor achter ik mien verschulen kan, heb ik een aorige serie oorlogsbuukies eschreven die veur een groot deel uutverköch bint. Kottens bellen mien een néve van ene uut ’t verzet die zien léven vake op ’t spel hef ezet umme de Pruus d’r onder te hollen. Hee woont een ende uut de buurte en had eheurd dat ome Tinus in ene van die boeken e portretteerd was. Of ik ‘m d’r an kon helpen.

Mar ja, uutverköch en dan ku-j niet veule meer. Merie zei dat ik d’r nog ene op zolder in de bewaarkaste had estop. Och mensen, dat was de bedoeling, mar ene keer de trappe op gunk de tillefoon en in de verraltereerdigheid had ik die op de zolder laoten slingeren. Merie plakken d’r een stuk luukse pampier van Sunterklaos aover heer. Arie, zo heet de man, dalen uit de Randstad of naor de Veluwe en halen ’t boek op. ‘Kiek mar op pagina dattig”, zei Merie. Zo varre kwamp hee niet. ’t Boek was in de midden deur muzen an evréten en ’t petret van ome Tinus verrinneweerd. Ik hebbe mien eigen leste buukien mar of estaon en laote d’r temee wel ene bie drukken.

Gister kwammen buur Knelis en Mina veur de traditionele käsborrel. Kort veurdat zee ofreizen na de andere kante van de Klippen was bie hun eur zwaoger Bert an kommen jagen. Ja, die kon niet alleent achter blieven. ’t Is een eerste klas opschepper en dat geldt ok veur wat d’r op taofel steet. Merie argeren zich, knipogen en zei tegen um: laot is zien hoe gauw as ie een keerse uut kunt blaozen. Gait moch beginnen. Nao twee keer was de mienten uut. Hee schuddekoppen, halen aosem en blaozen een wienglas van de taofel mar de keerse bleef branden. “Kiek”, zei Mertie, “gien aosem veur neudig. Ie druk op dit knöppen en ’t is klaor.” Ie hadden de kop van die keerl mutten zien. A-j al te innemend bint zie-j ’t verschil niet meer tussen een echte keerse en ene op battertiejen. 

Mensen, al nao gelang mooie, gezegende, zalige käsdagen en een gezond 2025 toe ewens van mien, Merie en de hele Klippen. GAIT.