Gait van de Renderklippen: Balsturig

Of ik noe wille of niet, ik mut met Merie naor een käsmark bie de Pruus. Daor geet een heel gedoe an veuraf. Wat vrouwluu in de kop heb zit niet in ’t achterste deel van de rugge. Dat weet elke keerl met een bettien ervaring.

Sunterklaos had de konte nog niet ekeerd of ’t gedram begun al. ’t Geheister met alles an ballen, veugelties en slingers wat de vrouw op zolder hef weg estop. Inspectie van de generaal eurzelf. Toen ik met de leste deuze van de trap of kwam hîemen ik as een drachtig nijlpeerd. Tied umme bie te komen was mien niet egund. Zoiets van uutpakken en wegwezen.

Merie pakken de deuze met ballen, stallen ’t spul uut en wis in ene oogopslag dat’t grei niet meer van disse tied was. “’t Is d’r an toe dat joe de ogen lös gaot; dat ku-j toch van honderd meter of al zien”, kreeg ik te heuren. En ze zetten eur argumenten krach bie deur met de äärms te zwaaien. Dat had ze niet mutten doen, want ze verleur ’t evenwich, höaken zichzelf, gunk onderuut en viel baovenop de käsballen. 

Daor waor zee ’t gruun en géél zag, vleugen de schärven in nog veule meer kleuren deur de kamer.

Annegien was de spelbréker. Zee is kottenns eslaag in zeg mar de rechten en kwam anzetten met alvaste een kadogien veur eur moe umdat ze altied zo an kan schuven veurdat ze nao eur eigen bedoening toe geet. En ie raojt ’t al: een pakket met versierings veur de käsdenne. Bie mien ogen van triomf, bie Merie een dankjoewel met een zunige lach. Daor gunk eur reissien aover de grens. En al helemaole toen Annegien op zolder nog een stel deuzen vun. Al met al zoveule dat ze de denne bie Knelis mien buur d’r ok nog mee op zollen kunnen tugen. 

Mar as vrouwluu samen spant dan leg ie ’t as manskeerl af. Ze maken mekare gek van wa-j op zon käsmark allemaole könt zien. Toen ik d’r tegenin wol gaon kreeg ik te heuren: “Gebruuk dat zaagsel is mannegien. De benzine kos daor niet veule meer dan de helfte  van wa-j d’r hier an kwiet bint.”

Da-j  d’r niet op water mee hen en weerumme  kunt gaon kwamp niet bie ze op.

Wens joe en ule mooie feesdagen. Groetenisse van GAIT.