Gait van de Renderklippen: Modderbeeld

A-j zo as Eddy petrettieskeerl bint en op zaoterdag an de lijn zit bie de voetbal dan hei-j gien weelde. Hee hef één groot veurdeel bie ’t Meneertien van de Krante. De mutt netties achter de draod blieven en hee zit binnen ’t veld. Noe liek dat ok een groter veurdeel as dat ’t in warkelijkheid is want as d’r een stel bie um in de buurte loop te trampen dan kan hee nar zo die balle veur de kwakert kriegen en dat kump an zal ik oe vertellen.

Eddy dan is nogal wat mans. Met al die toeters en bellen an zien toestellen komp ze um niet te nao. Zien fotoos toont haorfien an wie de schuld hef as ze an ’t worstelen bint. Mar die petretties gif hee niet an de scheids. Die mut zelf de ogen mar lös hollen.

Vergangen wéke was ’t al wat kolder. Dat trek oe dan al gauw in de botten. ’t Was niet daorumme dat hee zich zörgen maken. Zien dikste deel van de rugge is nogalbreed uut evallen dus hee kon de ellende goed verdelen. Hee mut in een flits reageren as ze um de balle an ’t vechten bint. In ene keer zei hee tegen ’t volk achter um: “Wat noe dan toch, ik zie allenig mar modder.” 

’t Worden al gauw dudelijk. Zien vrouw had um een stuk of wat bananen in de broekzak estop, want die wil um graag weer fit thuus kriegen. Mar ’t was niet de bedoeling um daor met de konte op te gaon zetten. En toe hee iets uut de zak wol halen had hee de vingers vol met smurrie.  En dat smeren hee ongewild  op de lens. Dat leveren ’t beeld op van voetballers in een modderballet. En zo worden een petrettieskeerl met zien bananen de pisang!

Eddy had helemaole niks umme de boel schone te poetsen, mar ‘t Meneertien stun in de buurte en die had met zien verkoldheid lappen genog umme zien maot uut de problemen te helpen. Dat hef d’r wel effies veur ehollen trouwens, want a-j ziet wat die fotografen allemaole mee heistert veur die ene foto waor de redzactie ‘t grune licht angif dan is dat lange niet wat zol dat. Mar an de dikkedeur van disse krante heb ze gien verkeerden. ‘t Was weer een mooi plaatien en daor kon Eddy goed mee huus an huus komen. Zien vrouwe mut um in ‘t vervolg thuus mar bie voeren…..