Column Gait: Kâsdenne

Ik haope dat bie Willem en Anna de vree weer terugge is noe Sunterklaos de trugreis naor Spanje hef emaak. ’t Hef daor zo an ’t ende van november flink tekeer egaon tussen Willem de nuchtere denker en Anna ’t traditionele gevuulsmens. ’t Voltrök zich op ’t monument dat Willem zowat veuir niks tegen een Käsdenne an liep en daor triomfantelijk mee de keuken binnen stappen.

Och mien lieve mensen, drie keer zo gauw stun hee weer buten. “Bin ie noe helemaole besukerd? Wie heb ‘t Sunterklaosfees nog in ‘t veuruutzicht. Heb ie oe ok al an laoten stéken deur al dat niejmoedse gedoe? Deur die ene tante uut Amerika die ons de echte Pieten hef of eneumen?” Ja, umme in de beeldspraak te blieven: Willem kreeg d’r nog een vége bie. Hee worden met denne en al naor de schure verbannen en daor is de struke in ’t donkerste huukien weg estop.

Ie vraog oe af of de kruujeniers zichzelf de leste jaoren niet de das uume doet dewiel dat ’t veur de kelte egees niet neudig is. Käsverlichting in oktober; Sunterklaos de ofjach en riepe veur de bromtol. Luu, ik willen veurkomen da-j Gait rascistische elementen in de mage schuuf. Bin hastik tegen rascisme. Wil de folklore zeker niet de nekke umme drééjen, mar ze-k noe zelf: a-j een käsbeumpien krieg toe esteuken dan bi-j toch een soeze a-j dat laot schieten?

Anna hef as commandant van ’t ledikant eur zin ekregen en ‘t beumpien steet nog altied in ‘t donkler een ende vot van de huuskamer. 

Ik denke dat ze wach op ’t berich dat Sunterklaois weer veilig in zien pakhuus in Madrid zit.

Iederene hef vrede op eerde veur in de mond,mar zelfs aover een käsdenne ontsteet d’r al gedoe. Ij zol haoste zeggen: raak de luu balsturig….
’t Mut niet gekker worden. Temee gaot Klaos en de Käsman nog met mekare op de vuus! Met dat ik dit schrieve kump Annegien van baoven met de deuze vol käsversierings. En Merie is al helemaole in de sfeer.  Nee, op de Klippen gien onenigheid. En ik wete mien d’r van aovertuug dat ’t bie Willem en Anna ok weer goed kump. Wat um an geet: goedkoop worden duurkoop. Holt ‘t met menare in de rieje.

Groetenisse van Gait.