Column Gait: Pompenpietjes

Veule luu in disse regio könt ‘t in de moerstaal béter angeven wat ze bezig hölt as in ’t Algemeen Beroerde Nederlands. En vergéét niet hé. Dat ’t dialect veuele older is as ’t ABN. Daor heb ik mien kottens nog is van laoten aovertugen deur geleerden van de Radbout Universiteit.

Ik mut de luu die ze-k dat de streektaal ok veur een bonke verwarring kan zörgen vanuut de praktijk geliek geven. Nem noe Henk van Huffelen. Hee is al steugien uut de tied, mar ik zal nooit vergéten dat de beste man zien dochter met een probleem opzadelen. Henk had veule oog veur de natuur en daor maak de vogels vanzelf ok deel van uut.

Op een gegeven moment zei hee tegen de vente, dewiel dat hee uut ‘t raam keek: “Wat hebbe wule dit jaor toch een bonke pompenpietjes um de deure.”Dezelfde wéke had de juf ‘t op de schole van zien dichter aover de trek van vogels op de Veluwe.

Elk kind worden d’r toe an ezet umme de name van een vogel te numen. Dat gunk van krééjen töt an mussen. Thea zien dochter dus was ok an de beurte. Die volgen eur va met ’t nao veurten brengen van een  zwarm pompenpietjes.

De juf keek eur an as of ze ’t in Keulen heuren donderen. Daor had ze nog nooit van eheurd. Of ze ’t wel zeker wis. ’t Deerntien schudden hef tig van ja. “Bij ons vliegen ze af en aan en volgens mijn vader waren het er nog nooit zoveel.”

De juf wol ’t weten. Halen een dik boek met vogelplaaties. Thea hoeven d’r niet veule blaagies  van umme te slaon en zei: “Hier staan ze. Kijk maar.” De juf: “Maar dat zijn toch koolmeesjes.”

Thea nam tussen de middag gien tied umme de jas uut te doen, staof op eur va of.

“De juf kent helemaal geen pompenpietjes. Ze zegt dat ’t koolmeesjes zijn.”

Pa knikken, “Ja, dat is de zundagse name. Ze zit bie ons meestieds biie de pompe in de buurte. Vogels heb ok dös mu-j mar denken. En ’t bint zukke gezellige pietjes.”

Ze hef de juf nao de middag uutleg kunnen geven. Die krullen een grote lach op eur gezicht. Ze vreug ’t deerntien umme eur va te complimenteren met die toepasselijke name. En ik twiefel d’r niet an dat ze ’t  hef edaon.

Groetenisse van Gait.