Gait van de Renderklippen: Mazzel

Ik wete niet hoe ’t joe vergeet, mar ik denke wel drie keer nao veurdat ik achter ’t stuur van mien autogien gao zitten. ’t Mut niet gekker worden, zeg Merie die mien zakgeld al op half zeuven hef ezet. A-j niet op pas geet ’t dezelfde kante uut as met de goldpries. En rèken d’r mar op dat temee een liter foezel ok een rib uut ’t lief geet kosten.

Merie nemp zelf ok een andeel in ’t bezunigen, want die geet noe lopend op ’t darp an. Dat is eur veurege wèke ok nog duur kommen te staon, want met dat roewe weer sleug eur de pluu te hetter en te fletter.

A-j denk da-j al een keer ’t zoerste gezichte van ’t westelijk halfrond heb beloerd dan had ie de uutdrukking van Merie mutten zien: ene die Den Haag en Brussel wel umme kon brengen. Nee, vakantie naor Iran zit d’r niet in, mar dat waren wie toch al niet van plan. Trump en Netanjahu maak ruzie, Iran dut ’t kanaal dichte en wie hier bint de klos. Ik heb al een brief eschreven namens de Vriestaat Renderklippen, mar die leg gien gewich in de schale.

As of ’t zo mos wèzen kreeg ik van de garage berich dat mien auto toe was an een beurte. Wat mien betref grote flauw kul want ’t körregien lup nog as een nééjmachine.  Ik bin met de ogen op ’t dadde knoopsgat nao de monteurs ejag, want ik zal oe vertellen: bie die autosmeerders schrief ze de leste tied met een vörke.

Ik bin d’r lopens nao toe egaon toen wie te heuren kregen dat ’t allemaole ree was, met inbegrip van bandenwissel. Ik laote d’r in de hâârfs toch een stel anderen op leggen want de heuvels op de Klippen bint oe al gauw te glad of.

De man achter de balie gaf mien de sleutels terugge en zei: “veur negentig euro bi-j de man Gait.” Ik hebbe daor met de mond lös estaon, want veur dat bedrag doet ze gewoonlijk de deur nog niet lös. 

Ik stotter een bettien umme uutleg. “Kiek Gait, ie hoeven pas met zestigduzend hier weer op an. De jonge die bie ons de boel op schrif had ’t niet goed bie ehollen.” Veur alle zekerheid heb ik nog wel de bande e kontroleerd. 

Affein, mien zakgeld is weer op peil, mar ik laote de auto in de schure staon, want Trump maak aoveral ruzie en ik wil niet langer liejen deur ‘t riejen.