Gait van de Renderklippen: Balgsmart

Alderkeizers ‘t was mien de wéke wel. Ik heb ’t in gien jaoren zo benauwd ehad. Ik bin zeker niet kleinzerig, mar d’r zit toch een ende an wat een mense verdragen kan.

De pillendrééjer vun ‘t neudig dat ik mien de blaoze nao liete kieken. Umme vaste te stellen of de straol stark genog was. Dat kunt ze niet vaste stellen met een méétlatte, daor kump wat drukwark an te passe. Ik mosse mien umme tien uur in de mâârntied melden bie de urologie zo as ze dat op zien zundags nuump.

Niet allenig dat: ik mosse ok antreden met een volle blaoze. Da-s makkelijk ezeg, mar ik moche nao acht uur al niet meer van ’t toilet gebruuk maken. Dat geet muuilijk samen met een hele sloot drinken umme an mien taks te komen. En dan ok nog achter ’t stuur op ’t ziekenhuus an. De sjaffeurs achter mien zult wel gek op ekeken hebben van mien riegedrag. As buukpien aover geet in balgsmart dan wilt de vuuties nog wel is van ’t gas of raken. Bie ’t ziekenhuus deur rood ereden. Ophollen jonge, mengen Merie zich d’r ok nog in.

Affein, ik hebbe met de hand op de buuk urologie evunden, mien langs twee mensen veur ’t loket ewrungen en an de juffrouw die d’r achter zat evraog waor ik ‘t kon doen. 

Uw naam, zei ze targend langzaam Och lieve mensen, ze mos mien zo neudig ’t hele geboorteceel lichten. “Beste mense, ik kan ’t nao twee uur plaspauze niet meer hollen”, heb ik iets hádder dan neudig deur ’t loket eroepen. En zelfs Merie knikken van ja. 

Mar goed, ik mosse nao een speciale sanitaire veurziening waor ze konnen méten hoeveule druk ik d’r nog op kon zetten. En toen…..en toen….kreeg ik te heuren dat ze d’r niks van begrepen, mar dat ’t apperaat alle diensten weigeren en niet meer an de praot was te kriegen. ’t Was jaoren geleden dat ik met Merie de foxtrot heb edanst, mar noe voeren ik in ene ruk de samba, de Engelse wals en de tango uut. Niet normaal meer. Ik heb nog net op tied anderweg af kunnen tappen, mar ’t had d’r ok gien twee tel langer mutten veur hollen.  Aover veertien dage mag ik op herhaling. Ik hebbe noe de straol al in za-k joe vertellen.

Ontvank de groetenisse van een zenuwlappige GAIT.