Gait van de Renderklippen: Een kat uutdelen

Wie bint d’r weer met dank an ’t Erfgoedcentrum Achterhoek en Liemers en an disse uutgever.

Merie zit met Annegien in een tweegevecht verwikkeld aover ankopen via ’t internet. Mien dochter hef daor egees gien muuite mee, mar Merie mut ‘dr niks van weten. “Ze nemp oe bie de klongels deerne. Ik wil kunnen zien wat ik ankope en laote mien niet bestrullen deur die verkoop op ofstand.” Annegien wrif eur moe in dat ze d’r alderkeizers olderwetse denkbeelden op nao hölt en dat ze met de tied mee mut gaon.

Ja, en as die beiden tegen mekaore staot te bekken dan maak ik dat ik uut de buurte komme, want ik wete bie veurbaat dat Gait dan mut beslissen en daorveur dank ik dat ’t zo soes.

Annegien hef zich niet tegen laoten hollen. “Waor maak ie oe druk umme moe, ie kunt dat spul net zo vake terugge sturen a-j wilt as ’t oe niet bevölt.” Schuddekoppend maak Merie zich uut de voete. Ze draag de woorde “kat in de zak” met zich mee. Ik hebbe mar gauw een taofel besteld bie de Horeca. An de witte taofel wo-j ’t gauwer eens as an de grunen mu-j mar denken.

’t Was knap gezellig trouwens en volgens Annegien mag va dat bes vaker bedenken. Jaja, ze kent een bonke talen, mar niet betalen. Daor steet tegenaover dat ze nao een studie Spaans noe ok nog meester in de rechten is eworden. Mar daormee hef ze de rechten van Merie niet onderuut ehaald. 

Diezelfde aovend viel d’r veur Gait nog heel wat te lachen. ‘t Was late eworden en toen wule net thuus waren kwam mien vrouwe d’r achter dat ze de grune container niet an de weg had ezet. Dat hölt ze altied ommenullig precies bie. Annegien wol-t wel veur eur doen. Mar dat was wat Merie betref niet neudig. Ze stik altied een stok onder de dekkel van die grune apperaat. Dat is umme te luchten hef ze mien wel is toevertrouwd. Zie nao buten en een tel of wat later vleugen va en dochter zo ongeveer van de stoel. Een schreeuw van achter ‘t huus. Merie störmen liekwit nao binnen. Toen zee de dekkel opbeuren vleug de kat van de buren d’r met een noodgang uut. Annegien reageren metene. “Gien kat in de zak, mar een kat in de bak moe.” Die kon de lol d’r gelukkig nog wel de lol van inzien.