Column: Merie hef opvliegers

Gait van de Renderklippen

Merie hef last van opvliegers. Nee nee, ’t is niet wat ie denk, want die tied is zee al lange te baoven. ’t Hef alles van doen met de eigenwiezigheid van Den Haag die de vluchtpogingen van Schiphol richting Lelystad tegen heug en meug deurgang wil laoten vinden. De gemeenten in onze contreien laot de ingezetenen weten dat ze bekend kunt geven hoeveule scha ze d’r van ondervindt. En mien Merie is wat dat an geet een echte Veluwse: as d’r âânt onrecht is en wat te halen völt dan steet ze op de barricades.

Mar ’t slimste is dat ik ’t veur eur mut opknappen. As ze mien tegenzin bemark dan krieg ik ‘m getrökken. ,,Gait Gait, ik had ie wiezer e dach. Stel oe is veur hoeveule mvan die Boeings aover ons heer komp. Wat denk ie dat de pensjoengasten temee doet, die blief vot jonge. Dat gaot die campingholders verhalen op de aoverheid en alles wordt dan duurder. As of de bedreiging van ‘t Corona virus al niet slim genog is.”

Pensjoengasten blief vot en de schaopen vlieg de hof in

En zo geet dat de hele dag mar deur. Scha hier en scha daor. ,,Ie weet niet half hoeveule kopzeerte a-j van die monsters krieg Gait. Apotheker in en uut veur parasetamollen. Ie heb d’r gien weet van wat dat spul vandaag de dag allemaole kost. Griep? Griep? Wie wordt met zien allen op de Veluwe egrepen deur ’t kammenet. Dat wordt bittere pillen, let ie mar is op. Schrieven Gait, en niet te lange wachten.” Umme nog is te onderstrepen wat ze bedoelt dauwt ze mien een penne onder de neuze.

Kottens begun Bouffon, de Franse buldog van Annegien te blaffen toen d’r een luchtballon aover de Renderklippen zeilen. Dat schaot eur te binnen. ,,Een zweefvliegtuug brenk ’t dier al van ’t peseel. Wat mut dat wel niet worden met die zwaore toestellen uut Lelystad. Gait Gait, kolder uut de polder. As zien minister van Nieuwenhuzen daor niet stille bie steet dan zal ik baas Rutte is laoten weten wat ons hier krang an steet.”

Ja ja, zie zal ’t laoten weten en ik kan ’t veur eur opknappen. De gekste dinge haalt ze d’r bie.,,Denk d’r mar is aover nao mannegien. Ie heurt noe al de helfte niet van wat ik zeg en temee bi-j helemaole doof. Is dat gien scha?” Ik heb mar niet ezegd dat mien in dit verband niks heuren goed van pas kump. Of ik noe al zeggen dat ze in Uune de meeste herrie an ’t heuf krieg en daor de aoverlast ’t slimste is, ’t leg gien gewicht in de schale.

,,Ie heb ’t verstand in de grote teen. Van al dat geknetter kan Lammert Nissing de schaopen helemaole niet meer te baas. De hond geet ‘m jankend de kooi in. De diers vlieg alle kanten uut en verrinneweert ons de hele hof. Mar as ie niet wilt luusteren dan hol ik oe ’t zakgeld in, ie mutten ’t zelf mar weten.”

De leste schadepost is ’t wasgoed op de bleike. Dat wördt in eur beleving van hagelwit roetzwart. Ik mut al dat gedoe uutschrieven. Merie is veur en achter de komma bezig umme een bedrag vaste te stellen. Ze vertrouwt ’t niet, gif zelf de brief af op ’t gemeentetehuus. Aarem is d’r nog lange niet klaor mee en Den Haag al helemaol niet. Ontvank de groetenisse van GAIT.