Gait van de Renderklippen: Smak

Zeg in ’t biezien van Dinie uut de Windhoek gien kwaod woord aover de plietsie of ie krieg van eur een pak rammel. De deerne hef nogal wat mee emaak. Ze was al een steugien an ’t krukkelen, mar is d’r  met eur deurzettingsvermogen niet bie neer gaon zitten.

“Nee Gait, bie neer gaon líggen”, zol ze mien onderbrèken as ze over de scholders had mee kunnen kieken. 

Hoe of ’t kwam weet ze zelf ok niet, mar wel dat ’t late op de aovend hef plaats evunden. 

“Ik zetten een trea en vuuf seconden daornao lag ik tussen de banke en een stel stoelen te spättelen. Hoe lange of ik doende bin ewes umme weer in de bene te komen mu-j mien niet vraogen. Wel dat ik mien gien raod meer wisse. ‘t Was niet zo’n kunst umme of te koelen want de temperatuur zakken nao een bedenkelijk niveau. Ik krege op een gegeven monument de gedachten d’r weer bie en zag dat de zaktillefoon veur ’t griepen lag. Ik hebbe Mientje, mien vaste hulpe, uut bedde ebeld en evraog mien kante uut te komen.”

Ja, deed ze, mar Mientje kon eur ok niet helpen, want die had toevallig de sleutels veur eerste hulpe in eleverd toen zee zelf met vakansie ging. 

’t Worden d’r niet bèter op an de Windhoek. Mientje hiel de kop d’r bie en hef van ende raod 112 mar ebeld.

Dinie: “Ik mudde toegeven dat ze d’r wark van heb emaak en ’t in warkelijkheid niet lange hef eduurd veurdat d’r zich een agent melden. De slietage an’t besef was gelukkig van korte duur. Ik heb ome agent laoten weten dat ’t dakraam nog op een kiertien stun en hee misschiens daor iets mee kon doen. Hee was een plietsieagent met een smal kuntien en nao wat gemattel en gemier kwam hee ‘t huus in. Ik bin eerlijk gezegd gien lichte vrouwe -  oh foi toch Gait wat zeg ik noe – mar de agent had flink wat pit in de mouwe en hee kreeg mien al rap weer in de bene. Ze kunt dan wel zitten te miauwen aover niet genog blauw in de straote, ik bin ered deur blauw in de kamer.”

‘t Zal wel niet de bedoeling wèzen dat ik dit joe allemaole an de neuze hange, mar ja, ik bin d’r van ‘t deurgeven.

Wie gaot met mekaar de hâârfs in. Naos Dinie is d’r al een hele smak blad evallen. 

Groetenisse van GAIT.