Gait van de Renderklippen: Störm

Aoverkump ‘t joe ok wel is da-j met de gedachten de ene kante uut schiet en met de bene de andere kante? D’r was bie mien an ’t fatale monument al een keer of wat veuraf egaon. Kort deur de boch ze-k ze wel is.

Nou, dat kloppen zowel nao de letter as nao ’t figuur. Dat leste slut dan op mien, ombenul as ik ware.

Ik mosse ääns um tien uutrwèèn, ’t liep al tegen half tiene en ’t was een half uurtien riejen. En ik hadden ’t foto apparaat nog egjes niet klaar leeg, niet bekeken of de batterijen ’t nog teuten en ook gin schone bonte zakdoek in de broek estop. 

‘t Lik Mien wel duidelijk da dan jezelf onder zulke umstandigheden opjaag. Een bettien teveule op ’t gevuul of gaot en te weinig op ’t verstand. Dat hef met ’t klimmen van de jaoren toch al een bettien las van slietage an ’t benul za-k mar zeggen.

Van de veraltereerdigheid ok nog eers nao ’t kleinste kamertien. Ja, daor viel gien tied mee te winnen vanzelf. Op de trugweg heb ik nao ik annemme de boch te kot enömmen. Een klap en ik ware gelieke weer helemaole bie de tied. Metene Merie ok uut ’t veuronder umme mien dudelijk te maken wat ik verhabbezak hadde. 

Och mien lieve stumper, ik hadde in de vloch de barometer van de mure of ejens. Met kwam Annegien ok nog binnen en daor mos Merie zo neudig ok nog eur beklag doen.

“Kiek is deerntien wat pa mien an hef edoan. De meter veur ’t weer te hetter en te fletter. Ik kan wel janken.” 

D’r stun mien niet zoveule anders te doen dan ’t apperaat weer op de plaatse te hangen.

“Moe, gnoe mij mar denken da Noa zoveule jaor bèter ’t weer met de botten kunt mèten dan da-j pa d’r niet meer op zollen kunnen ansprèken.”

Mar dat wol d’r bie eur egees niet in. 

En ’t worden d’r ok niet bèter op toen ik zei dat de barometer nog gewoon ’t dreuge weer an gaf wat kloppen as een zwerende vinger. Merie mos vanzelf ’t leste woord en zei dat d’r toch mar  mooi een stukkien baoven van de meter was efladderd. 

De Zunne hef de hele dag beschenen, de barometer zat de zunne dichte op de h, mar an de Renderklippen hef ‘t 24 uur estörmp. 

Luu, wie bint ongemark weer in de hâârfs verzeild eraak. Holt de kelte nog marbuten de deure. Groetenisse van GAIT.