Gait van de Renderklippen: Dwäs

Deur al die zunne in de zommer  en de dreugte die dat hef op elèverd is ’t blad dit jaor al veule eerder van de bomen evallen. Dat ku-j met een oge dichte ok wel zien. Merie wördt d’r onrustig van. Ie kent dat: as ’t blad van de bomen völt….

Ze hef mien al een keer of wat op de tabberd ezèten umme de boel op te rumen, mar ik bin gekke Henkie niet. Vandage vègen en määrn ku-j weer vanniejs an de gang.

Tötdat ’t heur te lange duren en ze d’r zelf mee gangs ging en niet zo’n klein bettien ok.

’t Had meer weg van grof geweld. ’t Stellen niks meer veur met de bladblaozer had ze mien al een keer of wat veur ehollen. Daor kwamp ze achter.

Ik zagge Knelis de buur al een keer of wat achter ’t venster loeren. Merie vègen ‘t zeugien allemaole zien kante op en dat maken um grenzeloos hellig zo as ik kon zien.

Ik wol d’r nog tussen komen, mar met de vrouwe was niks te beginnen. As blikken mien uut de tied hadden kunnen helpen…

Ik mudde toegeven dat ze de klus hef eklaord. Natties in eur opzich, mar niet in dat van de buur. Hee stappen met grote passen op ons of en eisen daww ’t blad metene vot zollen halen. Mar dat mannegien mut altied op zien wenken worden bediend en dat laote wie graag an zien Mina aover. 

’t Gunk d’r heer, niet tekort. ’t Worden al gauw duuster en van ’t in de container stoppen kwam ’t niet meer. 

Laot ’s nachens de wind opstèken zodat ‘t blad aover beider erf verspreid worden.

Nao Merie dus de wind d’r onder. Knelis en ik kwamen gelieke de deure uut, keken mekare an, schuddekoppen en heb van weerskanten de mesien an ’t blaozen ezet. “’t Is ok gien vrouwenwäärk”, waren wie ’t roerend met mekare eens. En Merie veur meer dan duuzend procent. De stemmning op de Renderklippen is umme edrééjd as een blad an de boom, of in dit geval van de boom. 

Kort van kop lös niks op zo-j kunnen zeggen. “En luie keerls ok niet”, had Merie ‘t leste woord. Luu, holt mekare vaste in disse beroerde tied. Wie probeert noe ‘t goeje veurbeeld te geven. ‘t Duurt nog een hele tied veurdat de bomen zich weer gruun toont.

Ontvank de groetenisse van GAIT.