Gait van de Renderklippen: Grammieterig

Wie lèèf in een tied van records. Van mekare de loef ofstèken, ’t bèter doen dan de buren, de pärmetaosie en de kennissen. ’t Gres of grös gruuner dan dat van de ander.

Merie en ik heb al een keer of wat e schuddekop as wie d’r mee van doen hadden. 

Mar kottens leupen wie zelf veurop en dat kwaod hef zich of estraf. Ik mut zeggen dat de vrouwe heel wat grunere vingers hef dan ik. “Zwart krieg ie ze ok niet, want de keren dat ie oe in de hof laot zien bint op de vingers van ene hand te tellen”, kreeg ik een schot deur de bene.

Ik gao vädder in bloemrijke taal en dat hef alles met de biedrage van disse keer van doen. Merie is een grote liefhebber van zonnepitten en van de bloemen die daor veur verantwoordelijk bint. Disse keer gruuien d’r ene tegen de Klippen op. ’t Had ‘d’r veule van weg dat ze ‘m van onderaf veuruut duwen. 

Dat brach eur op ’t idee umme mee te doen an de hoogsten in dit soort. 

Ik had ok een idee daww een beste kans maken, want de bloem stak as een trotse hane de ko p op.

Merie hef zich aoveral op de heugte laoten stellen van ruilmiddel umme nog wat meer lengte in de plant te kriegen.

Ze had de wiend d’r onder zogezeg. Mar daorin worden ze of etroef deur de natuur zelf.

Die tonen zich een blaoskaak en vieren ’t uut op ’t kroonjuweel van de Renderklippen. Ik heb Merie in gien jaoren zo zien lippen as toen zee ontdekken dat onze naogenog prieswinnende zunnebloeme de kop d’r bie neer had eleg. Ik wete niet wie ’t meeste geknak was: de bloem of mien vrouwe.

Ze hef zich nog uut esloof umme de plant weer aoverende te kriegen, mar d’r was gien redden meer an. Gien gratie veur de bloem van de natie. 

Mien pogingen umme plant-aardig te wèzen halen niks uut. “Blief met oe tengels van de stengels”, kreeg ik van katoen. 

Een verstel umme ’t met een andere bloem te proberen heb ik mar niet edaon. 

“Misschien is ‘t iets veur oe umme ‘t met onkruud te doen Gait. Dan bin ik d’r zeker van da-j met ‘t eremetaal gaot strieken”, worden mien toe eslingerd.

Ik bin d’r bange veur dat de Zonnebloem collecte d’s dit jaor onder te liejen hef op de Klippen. 

Luu, an zunne gien gebrek, mar in de column effies gien bloemrijke spraoke. Groetenisse van GAIT.