Gait van de Renderklippen: Schoer

A-j daags nao het loervenster kiek dan kom ie niet los van de politiek, zowel umme ons hen en as var over de grenzen. D’r dreig een bonke schoer. Die in Amerika Trumpettert zo onwies dat wie zelfs in onze Vriestaat op scharp staot. En as of dat nog niet genog ellende oplevert met honderdduzenden slachtoffers heb wie hier in de regio te maken met umslachtige pogingen kabinetten in mekare te timmeren. 

’t Kump d’r op neer dat luu bange bint dat ’t in de richting schut waor ik ’t met mien Merie al vake aover heb ehad.

Trump hef waardering ver zien marot Poetin en as ze het ver mekaar kunt kregen dan wordt Europa deur die beiden op edeeld. Een groot stuk van ’t oosten terug nao Rusland en dat wat dan aover blif in ’t westen eigent Trump zich toe.

Ze heb ’t merakels makkelijk met de verdeeldheid op ons continent. Poetin hef Hongarije al helemaole in zien mach en een paar anderen in die buurte knik ok al vinnig zien kante uut.

Bie ons in de Vriestaat heb wie al een vrach planken besteld umme de boel dichte te timmeren en de schaopen laoten mekkeren umme de Rus of te schrikken. En in dit geval heww ok de wolven nog achter de hand.

Korter bie huus bint de formateurs achter de gedienen nerig umme stellegien te vienden dat ’t met mekare an dörf de kommende vier jaor. D’r kump in sommige gemeentes niks van nao buten. De burger kan dan wel muu eworden wèzen van de politieke fratsen, hie of zie hef d’r wel mee te maken. ’t Gezonde verstand gebruken is gauw ezeg, mar of dat op wig tegen de luu die de mond ’t varste lös trek is veur mien de vraoge.

’t Liek d’r op dat wie noe te maken krieg met de gevolgen van de jaoren nao de Tweede Wereldoorlog dat de andach veur zoere bommen groter was as veur de echten. Natuurlijk zol ’t mooi wèzen as wie met een wereld te maken hadden waorin dat allemaole gerechtvaardigd is. Mar zo lange de Poetins en de Trumps onder ons bint ku-j dat vergèten. 

Mar ok nao de Paosen gewoon eier veur ons geld kiezen en ons ok gien pien in de buuk laten bezörgen deur de schreeuwlelijks.

Nee, ‘t is gien streven nao Gait op ’t pluus mar met Merie veilig thuus. 

Luu, laot ’t oe goed gaon en ontvank de groetenisse van GAIT.