Veurbeeld

En alles wa-j kunt bedenken bie Nederlanders en Medelanders hef Berend uut Elburg gien bosschap. Dat is d’r ene die zien hàtte volg. Veur um is ieder mense geliek umdat ze, noe praot ik um nao, “Allemaole niks an heb as ze onder de waterkrane staot”. Ik verzinne de name op zien verzoek, want hee wil niet dat de mensen waor dit hukien umme geet nao um op zuuk gaot.

Berend kan d’r niet tegen as hee argens onrecht zut. Hee bedenk zich dan gien moment, vlug d’r op of en löt zich niet terug hollen deur ‘t gevaor wat hee daor bie lup. Mar ok trek hee zich ’t lot an van de medemens die ’t d’r in disse tied slim veur hef staon. Corona hef een bonke ellende veoorzaak bie de kruuieniers, mar as die de prieze somtieds aover de kop laot slaon bint de mensen die amper rond kunt komen de slimste slachtoffers.

Barend liep kottens deur de Vesting. Dat wat de meesten niet ziet of niet wilt zien viel um gelieke in ’t oge. Zo ok de vrouwe op een terrassien met drie kiender umme heur hen. Ze zaten an un taofel met in ’t midden een zak éépels die wie van kort nao de oorlog patat nuump. Ze-k noe niet daww niks an de Belgen te danken heb. Ze bint in 1813 wel bie ons vot elopen, mar dat is een ander verhaal.

Ums de beurten moch ene een duuk in ’t zakkien doen. Toen de grootsten van ’t stel veur de beurte een nieje patat in de mond wil stoppen hieven ze um alleent mar an te kieken um dat nao te laoten. Veus te gauw was de zak lèèg. Mar dat hef Berend niet meer ofewach.

Zonder dat ze um in de smiezen kregen scheut hee ’t cafetaria binnen en deud wat zien hàtte um in gaf. Nog gauwer as dat hee binnen was ekomen was e ok al weer vot. Toe hee op de hoek achterumme keek zag hee dat de man van de éépels za-k mar zeggen een nieje grote zak patat in de holder op de taofel scheuf. Hee hef d’r vanzelf gien weet van wat d’r aover en weer ezegd worden.

Wel dat de cafetariaholder de hande in de luch stak. De moeder keek links en rechts op zuuk nao de grote onbekende. Dat hef Berend niet meer mee ekregen. Alleen thuus bie Dina hef hee ’t laoten weten. En die hef um een keer of wat aover de troef estreken. Ik make mien stàrk dat zien zakgeld disse wèke een stuk hoger uutevallen is. Dit is éépelloof van een andere orde, van de butencategorie. Zo lange as d’r Berends van dit kaliber op disse wereld rond loop is d’r nog haope. En daor hol ik mien an vaste.

Groetenisse van Gait.