Tettertantes

’t Veurjaor zit in de luch en dat ku-j an alles marken. De krokussen broes de grond uut, de narcissen laot zich zien en de winter hef de ofjacht ekregen. Die is d’r trouwens niet an te pas ekomen disse keer. Merie trek kasten en laaien lèèg en dan is ’t de tied dat ik mien waren mut. Bèter ezegd: pampieren en paperassen an de ketten leggen, want veur da-j ’t weet hef zee ze weg egooid. Ik bin hastik blie dat ze weinig weet hef van computers, want anders zol mien column ok nog gevaor lopen bie die opruumwoede.

Ik kom d’r trouwens niet helemaiole zonder kleerscheuren van of. Niet van de ene en niet van de andere kante. As ’t in huus weer netties was mos ’t buten ok een beurte kriegen. De stoepe was verrinneweerd in eur ogen en daor mos ik mien veur schamen. Ja, dan is ’t een echte drilsergeant van ’t ledikant en Gait kon zeggen wat e wol: de stoepe schrobben, ’t ruut wegtrekken en schone spuiten met die handel. Kalebateren ik ok nnog oaver een lösliggende tegen en daormee is dan de andere kant van de kleerscheuren verklaord.

Iets vàdderop zag ik buurman Knelis ok al an ’t heisteren. De kèèls bint de baas, mar de vrouwluu heb ’t veur ’t zeggen. En ’t gung ok allemaole nog niet vlot genog. ,,Van ’t wäärken krie ie ’t ok niet in de rugge”, kreeg ik te heuren. Dan wol ik weten weurumme ik mien nao een uurten egees niet meer bukken kon. En tussendeur nog een keer of wat nao binnen ekommandeerd umme lakens op te vouwen. Nao een hele hoop gemàttel was ’t zo vere dat de stoepe schoon espoten kon worden. 

Merie was met Mina an de klets eraak en dan weet ze op de Klippen wel da-j de klokke bèter stille kunt zetten. Dat rebbelt mar an. ’t Kossen muuite umme eur bie de krane te kriegen um mien zo in staot te stellen met de andere kante van de slange de rommel weg te spuiten. Mina en Merie halen de volgenden d’r al weer deur. A-j dat op een riegien ze deug d’r van de hele wereld niet zo veule en dan worden Poetin nog egees niet benuump. 

Toen ik ‘t leste ressien ruut weg had ewäärk kon ik de verlossende vraoge stellen umme de krane dichte te drééjen. De interesse van Merie was niet bie dat klussien mar de handelingssnelheid was verbluffend. Net as veule luu met de verkiezingen wis zee ‘t verschil niet tussen links en rechts. Ie vuult ‘m al ankomen en ik nog veule meer. In plaatse van de krane dichte gunk e helemaole lös. Dan wi-j wel effies springen met de noordoosten wind op de kletsnatte huud. En dan staot daor twee tettertantes ok nog bie te lachen. Ze hadden mien nog nooit zo zien zweten…

Groetenisse van Gait.