Zwaor

Die minkukel uut Moskou krig de wind flink van veurten. D’r zal een orkaan neudig wèèn um de griezel uut ’t Ktemlink weg te blaozen, dat wel, mar ’t brenk ons in ’t westen dichter bie mekare. Iederene hef zo zien eigen zörgen, de olderen onder ons mark smââns dat ’t kraak en piep, mar dat stelt helemaole niks veur bie wat de mensen in de Oekriene krieg te verwàrken. Daor wil ons volk de knippe veur trekken en de deure veur lös doen. Dan geet ’t principe van niet bie mien veur en deur ’t huus aoverboord.

Annegien, mien dochter, kreeg d’r veurege wèke een vleugien van mee. Die zut d’r op toe dat iederene op Schiphol in de rechte bane terechte kump en zonder pampieren niet onpasselijk wordt. Ze mutten daor een bonke talen praoten umme ’t iedeerene nao ’t zin te maken. Gien gemakkelijke opgave, want luu met vliegangst bint kort veur de kop. Dan mu-j de tank met takt helemaole open drééjen anders vlieg ie zelf, mar dan d’r uut.

En waor dat allemaole as vanzelf wordt beschouwd is de baas noe d’r aover nao gaon denken. Die hef ’t hele pàsseneel een bedankbrief estuurd. Niet melig, mar aover de post. Met de handtekening van de hoogste dikkedeur d’r onder. Dat is nog is wat. De één kreeg ’t compliment een dag of wat eerder as de ander. Daor beuren gien ene zich zwaor an.

Mar ze kregen allemaole wel op dezelfde dag een waarschouwing van de pos. De brief was te zwaor. ’t Gekke van ’t geval is dat bie de een ’t umme vuuf gram gunk en bie de ander umme zeuven. Een vremde maniere umme oe gram te halen. Ze heb zich de kop gek eprakkiezeerd hoe dat toch meugelijk was. ’t Kon ok niet an de handtekening liggen, want die kwam van dezelfde baas. As d’r verschillende directieleden mee an ’t wàrk waren ewes en de eent Jan van veurten heet en de ander Jozef Maria Johannes en gaot zo mar deur ja, dan had dat nog wat uut kunnen maken. 

Annegien denk dat ’t ene compliment wat zwaorder was dan ’t ander.  In elk geval hölt de post kennelijk niet van complimenten. Daor ziet ze ’t (te) zwaor in.

Heb ie ’t potlood al eslepen veur de verkiezings? In disse krante laot ze oe struk veur stuk weten waor as ze veur staot. Daor mut wel iets tussen zitten liek mien zo. In Moskou heb ze gien liesten neudig. Daor ku-j mar ene name invullen en das de name van ’t onmens dat op zien eentien de hele wereld d’r an waog.

Ik denke niet dat oost west thuus best in de politiek van weerde is. Waor oost ’t verpest vuul ik thuus mien in west. 

Luu, wèès un bettien aorig veur mekare.

Groetenisse van Gait.