Onderuut

Ik weet niet hoe ’t oe vergeet, mar ik worde gloepens hellig aover wat Rusland met Oekraïne uut haalt. ’t Is de vraoge hoe of ’t d’r veur steet as dit stuksien in de krante kump, mar wat hier gebeurt löt mien gien minuut lös. Denk ie da-j as oorlogskind veur de res van oe lèven van oorlogsellende verlös bint, mar dan steet daor een tiran in ’t Kremlin op die zonder blikken of blozen een heel volk d’r an waog.

’t Westen pak ‘m financieel bie de klongels en zeg: Vladimir, lever de poet in. Mar daor breng ie zukke dictators niet mee in verlègenheid. Wie geknipt is pak ie niet met de knippe. Een mannegien zonder gevuul die as ’t  um in de kop schut ok met bommen gooit en dat bint gien zure bommen. Stalin, Poetin, weerzin… Wat mu-j d’r in vrede mee an.I

k volge alles wat d’r op ’t loerscharm verschient. Daor ku-j ok al niet zo heel veule weerde an hechten, want de helfte heb ze verdrééjd en is nep. Langer dan een kwartiertien hol ik ’t ok niet vol, want dan heb ik de neiging umme as de kop van die keerl op ’t scharm kump de schoene uut te trekken en d’r mee te gaon gooien. Da-s trouwens ok niet niej want een iets minder slimme veurganger van Vladimir deud dat al eerder.

Mar dat volk kan zo een kaste lös trekken want die heb meer schoene as d’r bie mien keien in de veurtuin lik. En dat ongedierte hoef niet eers met de vrouwe te aoverleggen of un niej paar d’r nog of kan. Um d’r helemaole niet an te denken dat ik de loerkaste ok nog te hetter en te fletter zol gooien. 

Volges Merie mut ik mien niet zo laoten gaon. ,,Gait jonge, daor kunt wie toch niks an veranderen.” Mar dat maak ’t bie mien allenig nog mar arger.  Dat gevuul van onmach, aover eleverd wèèn an zukke beulen in t kwadraat.

Gister was ’t weer zo wiet. Ik had de schoene weer in de hande. Merie zag ’t gebeuren, riep dat ik bèter ’t hofpad in kon gaon umme ’t hold op te rumen dat deur de störm van de bomen is ewééjd. Dat heb ik mar edaon. Op een draf de hof in. Ik kwamme niet verre. De veters niet dichte, ik mééjen mien zelf van de bene en ik lag lankuut. ’t Risseltaot een beste bult veur de kop, de pette met de schoenlèpe op kriegn. 

Mar: wat stelt ‘t veur bie de ellende In Oekraïne? Helemaole niks toch. Ik heb dit offer mar wat graag ebrach. Um toch iets te doen heb ik names de Vriestaat Renderklippen een brief an Rutte op de pos edaon waorin ik dudelijk heb emaak dat die Poetin d’r bie ons niet in kump. Die zal Mark wel deursturen nao Moskou mag ik haopen. 

D’r is haope: de roebel is troebel. 

Ontvank de groetenisse van Gait.