Kiespien

Niet de messen, mar de potloden  wordt eslepen noe meert in de maond is. Een stemmige maond a-j begriep wat ik bedoele,

Wie gaot in meert ’t veurjaor in en een keer in de zoveul tied stap wie met makare ’t stemhökkien in. Um uut te maken wie ’t de kommende vier jaor veur ’t zeggen heb. Jammer genog bint d’r nog teveule luu die niet gaot met de dooddoener dat ’t niet uut maak of ie deur de hond of de katte ebeten wordt. Ik zol zo zeggen: probeer  ’t is uut met een Belgische hàdder en een Siamese poes. 

Zo hier en daor zie-j  de plakkaten weer veur de ruten. De een nog groter dan de ander. In Nunspeet, ik zegge niet waor, worden ’t een hele vertoning. As of  ’t verschil in de denkrichting van pa en moe nog niet slim genog was, maken de oldste zeune nog een dàdde keuze. Ze kwamen stiefsel tekot umme drie kanjers an pampieren op te hangen. Hastik tegen de zin van de jongste zeune, die gien daglicht meer in zien studeerkamertien zag komen. En die hef ’t hele spullegien d’r weer of etrökken. 

Volges Jaap uut Elspeet bint de Nederlanders kleurenblind. ,,Krieg ze een rood potlood en stemp ze gruun. As ie t’ snap meug ie ’t zeggen Gait”, zei hee kottens tegen mien. Hoef ie oe niet ofg te vraogen waor hee ’t zuch in de politiek.

Buurman Knelis had een heel ampàtte ervaring. Die wil atied alles weten. Toen hee van dichte bie wol zien wat veur petretten d’r op ’t bord  stunnen, strukelen hee en lag languut. Hee is al veur zestien meert aover de kiesdrempel evallen umme ’t zo mar is te zeggen.

‘t Is wel beroerd veur de kandidaten dat ze wordt of erèkend op wat ze in Den Haag uutspook. Van de nieje beheerder van ’t zwembad De Veldkamp heuren ik dat d’r nogal wat patiejen bint die eur op komp zuken. Merie snap niet dat ik mien ofvraoge weurumme dat ’t geval is. Ze wilt  zien, zeg zee, of d’r weer kansen bint umme ’t schoolzwemmen opniej in te voeren. Ik heb mien eigen gedachten. Ik denke dat de luu wilt weten hoe ’t vuult a-j half meert  köppien onder gaot…

Ik denke dat d’r temee een heel zwikkien met kiespien te maken krieg. En toch zal de kiezesmid d’r weinig an hemm. Dat bint de politici waorveur de stemming helemaole verkeerd of lup. Die as raodslid of slimmer nog, as wetholder, niet meer terug meug komen. Reden veur  een bonke vernemstige luu umme zich niet kandidaat te stellen. Want wie vindt noe ofgaon verkieslijk? Dan toch liever een bettien hees en de stem kwiet as  een hele preuze stemmen bie mekare. 

Ik haope dat ’t allemaole netties toegeet want an potloodaffaires heb wie gien bosschap. 

Groetenisse van Gait